Siońnia Minski abłasny sud vynies vierdykt pa kryminalnaj spravie ab pryčynieńni škody «Biełaruśkaliju» ŭ bujnym pamiery. Piać fihurantaŭ prysudžanyja da roznych terminaŭ adbyćcia pakarańnia.
Kryminalnaja sprava była zaviedziena ŭ 2015 hodzie ŭ dačynieńni da dyrektaraŭ AAT «Smalavičy-Suzon» i TAA «Vierasień-Servis» Kazimira i Antona Sabaleŭskich, ich buchhałtaraŭ Lubovi Kirylenka i Natalli Šutavaj i mieniedžara Andreja Kaścianieviča. Pa viersii śledstva, rodnyja braty Sabaleŭskija stvaryli ŭ 2010 hodzie «ŭstojlivuju arhanizavanuju złačynnuju hrupu», zakuplali kalijnyja ŭhnajeńni ŭ «Biełaruśkalija» i pradavali nie biełaruskim sielhaspradpryjemstvam, a pa falšyvych dakumientach - u Rasiju. Škoda «Biełaruśkaliju» skłała bolš za 700 tysiač dołaraŭ.
Siońnia sud pryhavaryŭ Kazimira Sabaleŭskaha pa sukupnaści złačynstvaŭ da 9 hadoŭ pazbaŭleńnia voli ŭ papraŭčaj kałonii ŭzmocnienaha režymu, kanfiskacyi majomaści i štrafu ŭ 23 tysiačy rubloŭ. Luboŭ Kirylenka atrymała 7 hadoŭ kałonii ahulnaha režymu i štraf u pamiery 16,1 tys. rubloŭ. Anton Sabaleŭski prysudžany da 5 hadoŭ i 6 miesiacaŭ papraŭčaj kałonii ŭzmocnienaha režymu i kanfiskacyi majomaści. Šutava i Kaścianievič atrymali pa 3 hady biez kanfiskacyi. Žančyna budzie adbyvać astatniuju častku pakarańni ŭ kałonii ahulnaha režymu, mužčyna — uzmocnienaha. Akramia taho, sud pastanaviŭ spahnać salidarna z Kazimira Sabaleŭskaha i Lubovi Kirylenka za 1,4 młn rubloŭ na karyść «Biełaruśkalija».
Raniej fihuranty spravy zajaŭlali, što nie razumiejuć, pra jakuju škodu moža iści havorka, kali ŭ 2010 hodzie składy «Biełaruśkalija» byli zabityja ŭhnajeńniami i pradpryjemstva dasyłała listy ŭ «Smalavičy-Suzon» z prośbaj razhruzić ich składy, bo vytvorčaść niemahčyma spynić.
