U Minsku startavaŭ samavity prajekt «#500hod», pryśviečany 500-hodździu druku Biblii Francyskam Skarynam. Udzielniki prajekta — hrupa maładych entuzijastaŭ, jakija ŭ volny ad pracy čas vyrašyli ŭšanavać pamiać knihadrukara.
Stvaralnikaŭ prajekta ŭraziŭ infarmacyjny vakuum vakoł hadaviny. Pakul błohier Anton Matolka nahadvaŭ čynoŭnikam pra abiacańnie pierajmienavać nacyjanalny aeraport u honar Skaryny, Hleb Łabadzienka vymušaŭ sotni karystalnikaŭ Facebook źmianiać avatarki na vyjavy sioletniaha jubilara, a Eduard Palčys zaklikaŭ: «Niama śviata? DIY!», stvaralniki «#500hod» źniali pretendujučy na virusnaść rolik z afrykancami, jaki nabraŭ va Ukantakcie bolš za 20.000 prahladaŭ, stvaryli admysłovy sajt i płanujuć jašče šerah uračystaściej.
«500 hod» — heta prajekt, pryśviečany dźvium, nie pabajusia hetaha słova, vialikim padziejam, jakija vyrašyli historyju XVI stahodździa na našych ziemlach: vydańniu drukavanaha nacyjanalnaha pierakładu Biblii Franciškam Skarynam i Refarmacyi, raspačataj Marcinam Luteram u Jeŭropie.
Naturalna, u taki hod my čakali, što ŭ honar našaha aśvietnika kali nie nazavuć nacyjanalny aeraport, to samaje mienšaje — zładziać uračystaści, vartyja sapraŭdnaha nacyjanalnaha hieroja.
Kali my zrazumieli, što ź cikavymi kulturnickimi prajektami niejak hłucha, vyrašyli — treba ładzić samim, bo nastupnaja takaja mahčymaść budzie tolki praz 500 hod!» — adznačyła adna z udzielnic «#500hod» žurnalistka Alena Balcava.
Alena Balcava, fota z sacyjalnych sietak
Stvaralniki prajekta płanujuć užo ŭvosień pravieści śviatočny Quest (haradskoje aryjentavańnie), Quizz (intelektualnuju hulniu), uračystyja spartovyja mierapryjemstvy, kancert, a taksama zładzić fota- i videaprajekt, pryśviečany Biblii. Infarmacyju pra prajekt možna atrymać na admysłovych staronkach #500hod «Ukantakcie», Facebook, Instagram, a taksama na sajcie 500god.by.
«My natchniajemsia dziejnaściu Skaryny, jaki drukavaŭ Bibliju. Uvohule, u Biełarusi, na žal, niašmat viedajuć pra hetuju knihu, mabyć, jak 500 hod tamu. Naprykład, učora bačyŭ apytanku, dzie ŭ žycharoŭ Minska pytalisia, ci čytali jany Bibliju. Nie znajšłosia nivodnaha čałavieka, jaki zmoh raspavieści, pra što ŭ joj idzie havorka. Navat u materyjałach jakasnych biełaruskich vydańniaŭ aŭtary vydajuć cytaty ź Biblii, jakija Skaryna vykarystoŭvaje ŭ svaich pradmovach, za jaho ŭłasnyja afaryzmy… My, jak vierniki, upeŭnienyja ŭ tym, što Biblija — heta sapraŭdy Słova Božaje, ale nie treba zabyvać, što heta jašče i častka ahulnajeŭrapiejskaj kultury. I nie viedać pra jaje ničoha ŭvohule dla adukavanaha čałavieka pavinna być soramna. Hetaja prabieły aśviety my chočam zapoŭnić», — padsumavaŭ fatohraf Andrej Novikaŭ.
Andrej Novikaŭ, fota z fejsbuka
U najbližejšy čas stvaralniki prajekta abiacajuć dzialicca ŭnikalnym kantentam z udziełam skarynaznaŭcaŭ, historykaŭ, bibleistaŭ, pierakładčykaŭ i inš.