Kala ŭkrainskaha Łucka z 4 pa 6 žniŭnia prajšoŭ adzinaccaty muzyčny «fiestyval ukrainskaha duchu» «Banderštat». Sioleta fest staŭ najbujniejšym za ŭsie hady jaho praviadzieńnia — bolš za 12 tysiač naviedvalnikaŭ, 2 tysiačy namiotaŭ, 3 vialikija sceny.
Užo tradycyjna na feccie adčuvałasia i «biełaruskaja prysutnaść». Hramadski siektar Atradu «Pahonia» pastaviŭ na «Banderštacie» svoj namiot, u jakim možna było nabyć biełaruskuju suvienirnuju pradukcyju, a taksama parazmaŭlać niepasredna z dobraachvotnikami. Adznačym, što arhanizataram fiestyvalu źjaŭlajecca deputat parłamienta Ukrainy Ihar Huź, jaki viadomy svajoj padtrymkaj biełaruskich dobraachvotnikaŭ.
U svaju čarhu, u muzyčnaj častcy festu Biełaruś była pradstaŭlenaja dvumia hurtami — Akute i «Zatočka». Chedłajnierami ž «Banderštatu» byli «Bumboks», «Vopli Vidoplasova», »Tartak», «Antitiła», O'torvald.
U minułyja hady na «Banderštacie» vystupali «Tavaryš Maŭzer», Vinsent, «Ściana», Terrakod, Brutto dy inšyja.
Akramia muzyčnaj sceny, udzielnikaŭ fiestyvalu čakali sustrečy ź vieteranami Ukrainskaj paŭstanckaj armii i viadomymi hramadskimi i kulturnymi dziejačami, litaraturnaja scena i šerah lekcyj na raznastajnuju tematyku, etničny kirmaš, načny kinasieans ukrainskaha kino i šmat inšaha.