Ministerstva zamiežnych spraŭ Biełarusi pakul nie kamientuje rašeńnia Rasii ab pryznańni niezaležnaści Abchazii i Paŭdniovaj Asiecii. Ci budzie jaki kamientar i kali jon źjavicca, pakul nieviadoma, zajavili BiełaPAN u pres‑słužbie źniešniepalityčnaha viedamstva.
Tym časam deputaty Mikałaj Čarhiniec, Uładzimier Barščoŭ, Siarhiej Kaścian, Siarhiej Hajdukievič, jakija naležać da kamisij pa mižnarodnych spravach savietu respubliki i pałaty pradstaŭnikoŭ, u adzin hołas uchvalili rašeńnie Rasiei i abrynulisia na Zachad. «Rasieja rašyła ŭstać z kalen», — zajaviŭ Hajdukievič. «Siońnia jość usie padstavy, kab padtrymać u hetym pytańni Rasieju», — kaža Barščoŭ. U biełaruskaj systemie deputaty prosta tak svaich mierkavańniaŭ nie vykazvajuć.
Nahadajem, 26 žniŭnia prezident Rasii Dźmitryj Miadźviedzieŭ padpisaŭ ukazy ab pryznańni niezaležnaści Abchazii i Paŭdniovaj Asiecii. Svaje zajavy z hetaj nahody ŭžo abnarodavali šerah krain Jeŭrasajuza.
Tak, MZS Francyi zajaviła, što rašeńnie Rasii «vyklikaje škadavańnie». «My ličym, što havorka idzie ab rašeńni, što vyklikaje škadavańnie, i paćviardžajem našu prychilnaść terytaryjalnaj cełasnaści Hruzii», — cytuje ahienctva RIA Novosti pradstaŭnika francuzskaha źniešniepalityčnaha viedamstva.
Rašeńnie Rasii «absalutna nieprymalnaje» i «supiarečyć normam mižnarodnaha prava», zajaviła kancler Hiermanii Anhieła Mierkiel.«Ja dumaju, što vieś Jeŭrapiejski sajuz vykažacca ŭ takim ža klučy», — dadała jana.
Vialikabrytanija «kateharyčna abviarhaje» rašeńnie Rasii ab pryznańni niezaležnaści Paŭdniovaj Asiecii i Abchazii. Pradstaŭnik MZS Vialikabrytanii zajaviła, što padobnyja dziejańni nie spryjajuć urehulavańniu situacyi na Kaŭkazie. Aprača taho, padkreśliła jana, takim krokam Rasija parušaje ŭziatyja raniej na siabie abaviazacielstvy.
Ministr zamiežnych spraŭ Šviecyi Karł Bildt zajaviŭ, što pryznańnie Rasijaj niezaležnaści Abchazii i Paŭdniovaj Asiecii źjaŭlajecca «naŭmysnym parušeńniem mižnarodnaha prava».«Hetaje rašeńnie aznačaje jasnaje i naŭmysnaje parušeńnie mižnarodnaha prava i idzie suprać fundamientalnych pryncypaŭ stabilnaści ŭ Jeŭropie», — pryvodzić słovy ministra RIA Novosti.
Svajo škadavańnie adnosna pryniataha Rasijaj rašeńnia vykazaŭ taksama ministr zamiežnych spraŭ Italii Franka Fracini.
Dziaržsakratar ZŠA Kandaliza Rajs taksama vykazała škadavańnie ŭ suviazi z rašeńniem Rasii pryznać niezaležnaść Abchazii i Paŭdniovaj Asiecii.
