Dziaržduma RF pryniała ŭ trecim, kančatkovym čytańni zakon ab uviadzieńni kurortnaha zboru ŭ šerahu rehijonaŭ Rasii. Dakumient praduhledžvaje ŭviadzieńnie ŭ ekśpierymientalnym režymie płaty, jakaja budzie spahaniacca z turystaŭ za karystańnie kurortnaj infrastrukturaj u Krymie, Krasnadarskim, Staŭrapolskim i Ałtajskim krajach, paviedamlaje VVS.
Plaž u Ałupcy, 2017. Fota alypka.info
Miarkujecca, što piłotny prajekt budzie doŭžycca čatyry z pałovaj hady — z 1 maja 2018 hoda da 31 śniežnia 2022 hoda. Potym ułady pavinny vyrašyć, ci treba ŭvodzić padobny zbor na ŭsioj terytoryi Rasii ci admovicca ad idei.
Ekśpierymient pravodzicca «ŭ metach zachavańnia, adnaŭleńnia i raźvićcia kurortaŭ, farmiravańnia adzinaj turysckaj prastory, stvareńnia spryjalnych umoŭ dla ŭstojlivaha raźvićcia śfiery turyzmu», havorycca ŭ dakumiencie.
Pamier kurortnaha zboru, terytoryi, na jakich jon budzie spahaniacca, a taksama paradak i terminy jaho vypłaty i pieraličeńnia ŭ biudžet buduć vyznačać rehijanalnyja ŭłady. Pry hetym pamier zboru nie pavinien pieravyšać 50 rubloŭ (0,84 dalara) z adnaho čałavieka za sutki ŭ 2018 hodzie i 100 rubloŭ — u astatnija hady praviadzieńnia ekśpierymientu.
Pamier zboru moža źmianiacca ŭ zaležnaści ad siezonu i času znachodžańnia turysta.
Srodki ad vypłaty kurortnaha zboru buduć nakiroŭvacca na finansavańnie rabot pa budaŭnictvie, rekanstrukcyi i dobraŭparadkavańniu kurortnaj infrastruktury. Pavodle tekstu zakona, da abjektaŭ kurortnaj infrastruktury staviacca abjekty lačebna-azdaraŭlenčaha, sacyjalna-kulturnaha, spartyŭnaha i rekreacyjnaha pryznačeńnia, u tym liku parki, haradskija lasy, plažy, nabiarežnyja i piešachodnyja zony.
Kurortny zbor buduć vypłačvać paŭnaletnija hramadzianie, jakija bolš čym na sutki spyniacca ŭ «abjektach raźmiaščeńnia» rehijonu, jaki ŭdzielničaje ŭ ekśpierymiencie. Abjekty raźmiaščeńnia, zhodna z tekstam zakona, — nie tolki hateli i haścinicy, ale i «žyłyja pamiaškańni, prydatnyja dla časovaha pražyvańnia».
Pa prahnozach urada, za piać hadoŭ ekśpierymientu dadatkovyja pastupleńni ŭ biudžet u Staŭrapalskim krai pieravysiać 2,02 młrd rubloŭ (34 młn dalaraŭ), u Krasnadarskim krai — 8,3 młrd rubloŭ, u Krymie — 16, 4 młrd rubloŭ.
Miž tym z Kryma pastupajuć paviedamleńni, što ašukancy ŭžo sprabujuć padmanuć turystaŭ, spasyłajučysia na zakon ab kurortnym zbory.
Adznačym, što padatak z turystaŭ spahaniajuć u mnohich krainach, pryčym časam pamier zboru zaležyć nie tolki ad horada, ale i ad prestyžu haścinicy.
