Saudaŭskaja madel Chułud aryštavanaja za videa, na jakim jana ŭ karotkaj spadnicy hulaje pa staražytnym forcie Ušajkir. Chułud nie admaŭlaje, što prahułka była, adnak śćviardžaje, što rolik vykłali ŭ sacyjalnuju sietku Snapchat bieź jaje viedama, paviedamlaje VVS.
Pra toje, što dziaŭčynu zatrymali, paviedamiła palicyja Saudaŭskaj Aravii. Na dopycie Chułud raspaviała, što virusny rolik «apublikavany ŭ akaŭncie, jaki prypisany joj bieź jaje viedama».
Pry hetym jana paviedamiła, što ŭvieś čas jaje supravadžaŭ mužčyna-svajak, što adpaviadaje zakonam Saudaŭskaj Aravii.
U paviedamleńni havorycca, što spravaj Chułud zaniałasia hienieralnaja prakuratura Er-Ryjada. U vypadku, kali dziaŭčynu pryznajuć vinavataj, joj pahražaje štraf i turemny termin.
«Toje, što Saudaŭskaja Aravija praciahvaje pieraśledavać žančyn za ich vybar adzieńnia, kaža ab tym, što ŭłady nikudy nie prasunulisia sa svaimi paternalisckimi i dyskryminacyjnymi pohladami», — skazała Sara Li Uitsan, dyrektar pa Blizkim Uschodzie pravaabarončaj arhanizacyi Human Rights Watch.
«Płany Saudaŭskaj Aravii pa źmienie hramadstva i pašyreńni pravoŭ žančyn nikoli nie stanuć realnaściu, pakul ułady pieraśledujuć žančynu za vybar adzieńnia», — dadała jana.
***
Saudaŭskija ŭłady zajavili, što Chułud adpuščanaja na volu. Pra heta piša hazieta Time.
Jak paviedamlajecca, palicyja vyzvaliła dziaŭčynu ŭ aŭtorak viečaram paśla niekalkich hadzin dopytu.