Ihar Słučak. Fota Siarhieja Hudzilina.
«Čarhovy vaš list tolki paćviardžaje maju racyju ŭ dačynieńni da taho faktu, jaki vy drenny juryst. Vy zajmajeciesia nikomu nie patrebnaj spravaj, nie treba zdavacca razumniejšym, čym vy jość na samaj spravie. Da razumnaha čałavieka vam jašče vielmi daloka. U svaich listach vy choć by piśmienna vyznačyli toje prava, jakoje vy chočacie realizavać zychodziačy z normaŭ Kanstytucyi Respubliki Biełaruś. Pakul ža ŭ vašych listach adlustravańnie čałavieka, jaki maje ŭzrovień raźvićcia — dziciačy sad jasielnaja hrupa», — napisała ŭ aficyjnym adkazie Maryna Bystraja (na fota nižej).
Heta nie pieršy list Iharu ad staršyni rady «Hranita», pierapiska ciahniecca daŭno. Spačatku spadarynia Bystraja adkazvała pryncypova pa-rusku. Na biełaruskuju movu jana pierajšła paśla taho, jak na jaje skłali pratakoł za admovu adkazvać pa-biełarusku.
Ź lista, atrymanaha dniami z Łuninieckaha rajvykankama, vynikaje, što Marynu Bystruju čakajuć jašče dva administracyjnyja pracesy. Na hety raz — za adkaz nie pa temie zvarotu, bo Słučak nie prasiŭ vučyć jaho žyćciu.
«U dačynieńni da staršyni Savieta Łuninieckaha rajonnaha hramadskaha abjadnańnia «Futbolny kłub «Hranit-Mikaševičy» Maryny Bystraj za parušeńnie zakanadaŭstva ab zvarotach hramadzian i jurydyčnych asob pačaty dva administracyjnyja pracesy pa art. 9.13. KaAP Respubliki Biełaruś.
Dadatkova paviedamlajem, što ŭ hramadskaje abjadnańnie nakiravana chadajnictva ab pryciahnieńni staršyni Savieta Łuninieckaha rajonnaha hramadskaha abjadnańnia «Futbolny kłub «Hranit-Mikaševičy» Maryny Bystraj da dyscyplinarnaj adkaznaści za dapuščanyja parušeńni patrabavańniaŭ aktaŭ zakanadaŭstva pry pracy sa zvarotami.
Razam z hetym, adznačana nieabchodnaść pryniaćcia nieadkładnych mier pa naležnamu razhladu vašych zvarotaŭ ad 7 červienia 2017, 17 červienia 2017, razhledzieŭšy ich paŭtorna», — havorycca ŭ liście za podpisam kiraŭnika spraŭ Łuninieckaha rajvykankama Alaksandra Hramyki.
Adkaznaść za parušeńnie zakanadaŭstva ab zvarotach — štraf ad 4 da 10 bazavych vieličyniaŭ.
Atrymaŭšy ad Maryny Bystraj niekalki źniavažlivych listoŭ, Słučak taksama źviarnuŭsia sa skarhaj u Brescki abłvykankam i prakuraturu. Adkazy jašče nie pryjšli.
«Zdarałasia, pa 20 pahroz na dzień ad rasijan prychodziła» — hutarka z kultavym abaroncam movy Iharam Słučakam
