Sudździu Krasnadarskaha krajavoha suda (Rasija) Alenu Chachalevu zapadozryli ŭ bujnych tratach na viasielle jaje dački, dzie vystupali zorki rasijskaj estrady. Pra heta ŭ svaim instahramie paviedamiŭ advakat Siarhiej Žoryn.
Advakat apublikavaŭ videazapis ź viasiella, na jakim vystupali śpievaki Mikałaj Baskaŭ i Valeryj Mieładze.
«Heta videa mnie dasłaŭ čałaviek, jaki prysutničaŭ na hetym mierapryjemstvie. Pavodle papiarednich acenak, košt hetaha mierapryjemstva aceńvajecca prykładna ŭ dva miljony dalaraŭ. Tam byłaja niejkaja kolkaść zorak estrady pieršaj vieličyni, heta adbyvałasia ŭ topavaj ustanovie Krasnadarskaha kraju, taksama byli darahija padarunki», — raspavioŭ Žoryn telekanału Dožd́.
Viadoma, što na viasielli vystupili zorki rasijskaj estrady, siarod jakich - Kabzon, Mikałaj Baskaŭ i Valeryj Mieładze. Pa słovach viadučaha Andreja Karaułava artysty za vystupy atrymali kala 400 tysiač jeŭra. Pavodle jaho źviestak, adnym z padarunkaŭ dla maładych była mašyna Bentley.
Namieśnik staršyni savieta sudździaŭ Krasnadarskaha kraju Uładzimir Kiślak zajaviŭ «Kommiersantu», što aficyjnaha zvarotu z nahody vydatkaŭ sudździ nie pastupała, a publikacyi ŭ sacsietkach nie źjaŭlajucca padstavaj dla praviadzieńnia pravierki.
Pavodle dadzienych, apublikavanych na sajcie Krasnadarskaha krajavoha suda, Alena Chachaleva ŭ 2016 hodzie zarabiła 2,6 miljona rasijskich rubloŭ (43,5 tys. dalaraŭ). U jaje ŭłasnaści - dom płoščaj 66,7 kvadratnych mietra i dva ziamielnyja ŭčastki.
