U bufiernych zonach biaśpieki ŭ Siryi praduhledžvajecca prysutnaść rasijskaj vajennaj palicyi, paviedamiŭ žurnalistam kiraŭnik rasijskaj delehacyi na pieramovach u Astanie Alaksandr Łaŭrenćjeŭ, paviedamlaje RIAN.
Pytańnie ab miežach zon deeskałacyi i kantroli nad imi abmiarkoŭvajecca na piatym raŭndzie pieramoŭ pa Siryi ŭ Astanie, jaki pačaŭsia ŭ aŭtorak i pradoŭžycca dva dni. U sustrečy biaruć udzieł krainy-haranty — Rasija, Turcyja i Iran, a taksama delehacyja AAN i naziralniki — ZŠA i Iardanija.
«Pakul składana kazać ab prysutnaści rasijskich naziralnikaŭ, pradstaŭnikoŭ rasijskaha Ministerstva abarony, tym nie mienš, u cełym praduhledžvajecca prysutnaść rasijskaj vajennaj palicyi ŭ bufiernych zonach biaśpieki. Ale, znoŭ ža, hetaje pytańnie da kanca jašče nie ŭzhodnienaje», — adznačyŭ Łaŭrenćjeŭ.
Pa słovach rasijskaha pradstaŭnika, u vypadku padpisańnia dakumienta ab zonach deeskałacyi kankretnyja dziejańni pa ŭstalavańni kantrolu nad imi i raźmiaščeńni sił buduć pryniatyja na praciahu dvuch-troch tydniaŭ.
Jon paviedamiŭ, što linii sudakranańnia i miežy druhoj i treciaj zon deeskałacyi amal vyznačanyja.
«Jość jašče pytańnie ŭ nas pa Idlibie i jość siakija-takija reziervacyi jašče pa paŭdniovaj zonie. Ale, tym nie mienš, ja dumaju, što nie za harami toj čas, kali my zmožam vyjści na niejkaje kampramisnaje rašeńnie pa hetych pytańniach», — dadaŭ kiraŭnik rasijskaj delehacyi.
Łaŭrenćjeŭ padkreśliŭ, što ad zapusku pracesu stvareńnia zon deeskałacyi zaležyć pryniaćcie cełaha šerahu spadarožnych dakumientaŭ, jakija pracujuć na ŭzmacnieńnie davieru pamiž supraćlehłymi bakami ŭ Siryi.
«Heta i pałažeńnie pa abmienie źniavolenymi i hvałtoŭna ŭtrymanymi asobami, i pałažeńnie ab raźminiravańni pomnikaŭ histaryčnaj spadčyny. Jany znachodziacca ciapier u prapracoŭcy», — skazaŭ jon.
