Ułady Havany majuć namier adnavić haradskuju sietku subsidavanych «luboŭnych hatelaŭ», jakija isnavali na Kubie až da 1990-ch hadoŭ, paviedamlaje VVS.
Getty
Haradskija ŭłady tłumačać rašeńnie adnavić hateli tym, što žycharam pieranasielenaj Havany čaściakom niama dzie adasobicca, a pryvatnyja firmy, jakija sprabavali zaniać nišu «hatelaŭ na hadzinu», prosiać za pakoi zanadta vysokuju canu.
Inicyjatyva, jak miarkujuć, dapamoža pakłaści kaniec praktycy, kali žychary kubinskaj stalicy zajmajucca kachańniem pad adkrytym niebam.
«Pasadas», abo «hateli kachańnia», isnavali na Kubie až da 1990-ch hadoŭ. Numary z pahadzinnaj apłataj pryznačanyja dla par, jakija chočuć zaniacca seksam.
U 1990-ch hateli stali achviaraj ekanamičnaha kryzisu. Budynki źbiadniełych «pasadas» vykarystoŭvalisia jak schovišča ad urahanaŭ.
Kamientujučy inicyjatyvu pa adnaŭleńni hatelaŭ, u horadabudaŭničym departamiencie Havany kažuć, što ŭ pieršuju čarhu razhladajuć ich jak krynicu dobrych pastupleńniaŭ u biudžet.
Akramia taho, hateli pavinny dapamahać adasobicca žycharam horada, u jakim vostra staić pytańnie niedachopu žyłpłoščy.
U Havanie isnuje deficyt žylla. Niaredkija vypadki, kali niekalki siemjaŭ žyvuć u adnoj kvatery, a pary, jakija razyšlisia, praciahvajuć žyć razam, tamu što im niama kudy źjechać.
Paśla źniknieńnia sietki subsidavanych uradam «pasadas» na rynak vyjšli pryvatnyja hulcy, adnak akazałasia, što ich pasłuhi zanadta darahija. Za dobra abstalavany pakoj z kandycyjanieram i kamfortnym łožkam jany patrabavali ŭ siarednim kala piaci dalaraŭ, heta značyć prykładna šostuju častku zarobku siaredniaha kubinca (jon składaje mienš za 30 dalaraŭ).
Parački, jakija zajmajucca seksam — siońnia zvyčajnaje vidovišča ŭ parkach i na plažach Havany.
Kamientatar ŭ haziecie Trabajadores uspaminaje, što pieršyja «pasadas» adkrylisia ŭ centry Havany ŭ kancy XIX stahodździa, i mnohija kubincy zachavali pra ich vielmi jarkija ŭspaminy — «pra niezabyŭnyja pacałunki i parćje, jaki klikaŭ kachankaŭ, kali ich čas zakančvaŭsia».
