Ukrainskaja palicyja zatrymała sieryjnaha rabaŭnika bankaŭ, jaki pakidaŭ na miescy złačynstva šakaładki dla kasiraŭ. Pra heta zajaviŭ načalnik palicyi Kijeva Andrej Kryščanka padčas bryfinhu, pieradaje 112.ua.
112.ua
Pa słovach Kryščanki, praca pa pošuku rabaŭnika praciahvałasia paŭtara hoda. Rabaŭnikom akazaŭsia mužčyna 1967 hoda naradžeńnia, jaki raniej pryciahvaŭsia da kryminalnaj adkaznaści ŭ pačatku 80-ch. Jon pracavaŭ na niekalkich pracach, vyjazdžaŭ na zarobki za miažu, pracavaŭ u śfiery rekłamy, ale vyjšaŭ ź biznesu.
«Pa jaho słovach, jon ździejśniŭ bolš za 30 złačynstvaŭ i nie tolki ŭ Kijevie. My na ciapierašni čas abhruntavana dakazvajem ździajśnieńnie 14 razbojnych napadaŭ na praciahu 10 hadoŭ, pa jakich sabranyja dokazy i pa jakich paśla praviadzieńnia pieršačarhovych śledčych dziejańniaŭ złačyncu paviedamiać ab padazreńni», — zajaviŭ Kryščanka.
Pavodle danych palicyi, rabaŭnik pieravažna vybiraŭ banki biez achovy, dziejničaŭ vielmi abačliva, papiarednie pravodziŭ vyviedku, nikoli nie vykarystoŭvaŭ telefon i zakryvaŭ tvar z dapamohaj kapieluša abo šapki i akularaŭ.
Padčas dopytu rabaŭnik patłumačyŭ, što «pravodziŭ eksprapryjacyju i rabavaŭ narabavanaje». Taksama jon zajaviŭ, što častku srodkaŭ vydatkoŭvaŭ na dabračynnaść, častku na siabie — na pryviadzieńnie ŭ paradak svajho doma.
