Sud u centralnym Kitai pastanaviŭ vypłacić pradstaŭniku ŁHBT kampiensacyju za prymusovaje «lačeńnie ad homaseksualizmu» i prynieści jamu prabačeńni, paviedamlaje VVS.
Pazoŭnik pa proźviščy Ju źviarnuŭsia ŭ sud paśla taho, jak jaho žonka i svajaki ŭ 2015 hodzie adpravili jaho na prymusovaje lačeńnie ŭ psichijatryčnuju lakarniu horada Čžumadziań pravincyi Chenań.
Na praciahu 19 dzion u špitali jamu rabili injekcyi i davali tabletki.
Zhodna z rašeńniem suda, prymusovaje źmiaščeńnie ŭ psichijatryčnuju balnicu źjaŭlajecca parušeńniem pravoŭ hramadzianina, kali jon nie ŭjaŭlaŭ pahrozy dla hramadstva.
U mai sud zapatrabavaŭ, kab psichijatryčnaja balnica, u jakoj Ju byŭ pastaŭleny dyjahnaz «parušeńnie seksualnych pieravah», apublikavała ŭ adnoj ź miascovych haziet prabačeńni pierad Ju i zapłaciła jamu kampiensacyju ŭ pamiery 735 dalaraŭ.
U 2014 hodzie aktyvist Pen Jańchuej, jaki abaraniaje pravy hiejaŭ, prajšoŭ lačeńnie ŭ pryvatnaj psichijatryčnaj klinicy, kab atrymać infarmacyju ab «lačeńni homaseksualizmu» z dapamohaj elektrašoku. Pra hety sposab lačeńnia havaryłasia ŭ rekłamie kliniki.
Paźniej aktyvist źviarnuŭsia ŭ sud z pazovam da kliniki, zapatrabavaŭšy kampiensacyju za ździeki, jakija jamu daviałosia pieranieści ŭ chodzie «lačeńnia». Sud pastanaviŭ vypłacić aktyvistu 500 dalaraŭ u jakaści kampiensacyi. Taksama pa patrabavańni suda rekłama kliniki była źniataja.
Da 2001 hoda homaseksualizm u Kitai razhladaŭsia jak psichijatryčnaje zachvorvańnie, jakoje nieabchodna lačyć. Niahledziačy na toje, što ŭ niekatorych haradach, takich jak Šanchaj, pravodziacca hiej-parady i fiestyvali, staŭleńnie da hetaj źjavy ŭ Kitai zastajecca davoli kansiervatyŭnym.
Pavodle danych pravaabaroncaŭ, miljony hiejaŭ z-za cisku z boku svajakoŭ i hramadstva addajuć pieravahu ŭstupać u hieterasieksualnyja šluby, čym adkryta zajaŭlać ab svajoj seksualnaj aryjentacyi.
U mai ŭłady Kitaja zabłakavali pracu mabilnaha dadatku dla znajomstva hiejaŭ i leśbijanak.
U 2016 hodzie kitajski sud adchiliŭ pazoŭ dvuch žycharoŭ horada Čanša na paŭdniova-uschodzie Kitaja da miascovych uładaŭ, jakija admovilisia zarehistravać ich adnapoły šlub. Heta była pieršaja ŭ KNR sproba ŭzakonić homasieksualny sajuz. Pavodle kitajskich zakonaŭ šlub zaklučajecca pamiž mužam i žonkaj, adnak u tekście nie paznačana, što muž abaviazkova pavinien być mužčynam, a žonka— žančynaj.
