«Ja žonka biełaruskaha vajskoŭca — lotčyka 61 avijacyjnaj bazy», — tak pačynaŭsia list, jaki atrymali pierad śviatami šerah biełaruskich ŚMI, u tym liku i «Naša Niva». «Chartyja» i «Partyzan» apublikavali jaho na sajcie, a my vyrašyli pravieryć. Voś što havorycca ŭ liście, napisanym vielmi pravilnaj rasiejskaj movaj:
«Usio žyćcio moj muž prasłužyŭ u Baranavičach ad maładoha lejtenanta da majora. Amal usie hetyja 15 hadoŭ, błukajučy pa zdymnych kvaterach, my prastajali ŭ čarzie na budaŭnictva žylla. I voś, u toj momant, kali pierad nami zamajačyła nadzieja na atrymańnie chacia b słužbovaha žylla, jakoje chutka vyzvalać ščaśliŭčyki, jakija pabudavali kvatery ŭ novieńkaj šmatpaviarchoŭcy la stadyjona, my daviedvajemsia, što zasielać zamiest nas rasijskich lotčykaŭ, jakija zusim chutka prybuduć.
Nam ža sa słovami «nu, 15 hadoŭ čakali, što jašče hod-druhi nie pačakajecie?» paraili jašče paciarpieć. Zrazumiejcie mianie pravilna, ničoha suprać rasiejskich lotčykaŭ i ich siemjaŭ u Biełarusi ja nie maju. Ale ž treba było tady zahadzia padrychtavać žyllo dla ich, a nie zabirać u svaich ža aficeraŭ.
Naźbirać na kvateru siamji z dvuma dziećmi na zabieśpiačeńnie aficera PS RB prosta nierealna. Ilhotnych kredytaŭ na kuplu žylla vajskoŭcam ŭžo nie dajuć, piensijny ŭzrost padaŭžajuć. Voś i dumaj potym, jak i Radzimu abaranić, i siamju prakarmić.
Va ŭpraŭleńni žyllovaha zabieśpiačeńnia nam skazali, što my nie adny takija — čarha zastyła nie tolki ŭ Baranavičach, ale i ŭ Babrujsku, i ŭ Mačuliščach, tam taksama treba niedzie raźmiaścić siamji rasijskich vajskovych lotčykaŭ.
A tut jašče ŭ internecie źjaŭlajecca infarmacyja, što rasiejskaja avijacyja zastaniecca ŭ Biełarusi paśla paradu (na sajcie mediabrest.by). Vychodzić, što moj strach tolki paćviardžajecca.
Apošniaja nadzieja na Vas. Liču, što tolki aśviatleńnie ŭ presie moža dapamahčy zrušyć hetaje pytańnie ź miortvaj kropki.
Nazvać proźvišča svajo nie mahu, bo bajusia, što heta moža paŭpłyvać na karjeru muža, dy i naohuł ciapier luboha aficera mohuć zvolnić biez vysłuhi, a značyć i prava na piensiju, a novuju pracu znajści zusim nie prosta».
List pryjšoŭ nam ad adrasata, jaki maje paštovuju skryniu ŭ sistemie «protonmail.com» — heta zvyšabaronienaja (u paraŭnańni ź niejkim, skažam, Jandeksam) sistema, jakuju ciažej uzłamać abo vyśvietlić, kamu nasamreč naležyć skrynia.
Što ž udałosia daviedacca «Našaj Nivie»?
1) Jak nam stała viadoma, kvatery ŭ zhadanym domie ŭ Baranavičach atrymajuć tolki biełarusy — nie tolki aficery (pra lotčykaŭ i kazać niama čaho, heta elita), ale navat praparščyki z techničnaha zabieśpiačeńnia bazy.
«Kab lotčyk i nie atrymaŭ kvateru za 15 hadoŭ? Nie moža być takoha», — zapeŭniŭ nas aficer z baranavickaj bazy.
2) Niama nijakich padstaŭ mierkavać, što Maskvie ŭdasca naviazać Biełarusi raźmiaščeńnie bazy. Kupla Biełaruśsiu novych samalotaŭ Su-30-SM, chutčej za ŭsio, jość kropkaj u sprečcy pra bazu.
3) Pytańni žylla rasijskich lotčykaŭ, jakija časam biaruć tut udzieł u sumiesnym patrulavańni hranic, vyrašajucca ŭ inšym paradku: jany žyvuć u haścinicy, im zdymajuć kvatery.
4) Ciažka skazać, kamu spatrebiłasia ŭkidvać u ŚMI infarmacyju pra pieradaču kvater rasijskim lotčykam zamiest biełaruskich.
