Barysaŭski zavod miedycynskich preparataŭ — adziny farmaceŭtyčny zavod nie tolki ŭ Biełarusi, ale i siarod krain SND, jaki siertyfikuje svaju vytvorčaść na adpaviednaść patrabavańniam GMP FDA. Pradpryjemstva ŭžo prajšło dva etapy aŭdytu vytvorčaści tabletak, kapsuł i sterylnych antybijotykaŭ inśpiekcyjaj FDA (Food and Drug Administration, ZŠA). Vynikam hetaje pracedury (jakaja, darečy, kaštuje dziasiatki tysiač dalaraŭ) stanie mahčymaść pastavak lekavych srodkaŭ u ZŠA i na inšyja novyja zamiežnyja rynki.
Niekatoryja dumajuć, što lekavyja preparaty ŭ Biełarusi vyrablajucca ŭ niejkich padvałach
Pabyvaŭšy ŭ cechach BZMP, my nie možam nie skazać pra vyklučnuju čyściniu na pradpryjemstvie i vysokuju kulturu vytvorčaści.
«Niekatoryja dumajuć, što lekavyja preparaty ŭ Biełarusi vyrablajucca ŭ niejkich padvałach i paŭrazburanych pamiaškańniach «na kalenkach». Ale paśla naviedvańnia našaha pradpryjemstva ich mierkavańnie źmianiajecca na zusim advarotnaje», — kaža hienieralny dyrektar BZMP Vital Dzieraš. I heta sapraŭdy tak. Nazirajučy za ŭsimi vysokatechnałahičnymi pracesami, jakija adbyvajucca na zavodzie, adčuvaješ vialiki honar za toje, što ŭ našaj krainie isnujuć śpiecyjalisty, jakija zdolnyja arhanizavać nastolki navukajomistuju sučasnuju vytvorčaść.
Vytvorčy praces
Kožny cech adpaviadaje peŭnamu kłasu čyścini. Najvyšejšy kłas maje cech pa vytvorčaści antybijotykaŭ. Utrymańnie takich asablivych pamiaškańniaŭ patrabuje vialikich hrošaj, tamu ich płoščy starajucca rabić jak maha mienšymi. Ale navat uličvajučy hety fakt, zavod maje hihanckija pamiery i dahetul praciahvaje pašyracca.
Cech ujaŭlaje ź siabie sietku kalidoraŭ, uzdoŭž jakich raźmieščanyja vytvorčyja pamiaškańni. Dla kožnaha pracesa adviedzienaje asobnaje pamiaškańnie z peŭnym abstalavańniem i adnym ci niekalkimi apieratarami. Nazirać za vytvorčaściu davodziłasia ŭ asnoŭnym praz vokny ŭ kalidorach.
Na kožnym paddonie — recept adnoj sieryi peŭnaha rečyva. Kali syravinu ŭzvažyli, tabletkavaja abo kapsulnaja masa źmiešvajecca ŭ śpiecyjalnych jomistaściach roznych pamieraŭ — binach (ad 80 da 1250 litraŭ).
Usio abstalavańnie — italjanskaje. Dalej adbyvajecca praces suški, paśla jakoha chimičny pradukt traplaje ŭ inšy bin. Nastupnaja apieracyja, jakaja adbyvajecca ŭ mašynie z fantastyčnaj nazvaj «cykłop», — apudryvańnie. A ŭžo potym adbyvajecca presavańnie rečyva ŭ tabletki abo hranulavańnie. Śpiecyjalnaja mašyna vyrablaje 600 blistaraŭ (płaścinak pa 10 tabletak) za adnu chvilinu. A heta 10 blistaraŭ za siekundu!
U cech pa vytvorčaści injekcyjnych antybijotykaŭ u fłakonach nas puścili litaralna na 5 chvilin. Heta preparaty, jakija nie sterylizujucca, tamu ŭ pamiaškańniach asablivyja patrabavańni da čyścini.
Volha Bołdava, hałoŭny technołah BZMP, raspaviała, jaki šlach prachodziać preparaty ad idei stvareńnia anałaha da ŭkaranieńnia ŭ vytvorčaść i ŭžyvańnia chvorymi:
«Praciahłaść i košt adnoj raspracoŭki zaležyć ad asvojvajemaj lekavaj formy i abjomu kliničnych daśledavańniaŭ, jakija pryznačaje Ministerstva achovy zdaroŭja. U siarednim praciahłaść raspracoŭki składaje ad troch da piaci hadoŭ. Luby praces asvajeńnia pačynajecca z markietynhavych daśledavańniaŭ. Paśla taho, jak technałahičnaja słužba vyznačyła mahčymaść vypusku preparata našym pradpryjemstvam, a ekanamičnaja słužba — ekanamičnuju metazhodnaść, pačynajecca etap pošuku i nabyćcia syraviny naležnaj jakaści. Syravina pavinna adpaviadać patrabavańniam dziaržaŭnaj farmakapiei, jakija harmanizavanyja ź jeŭrapiejskimi patrabavańniami. Dalej substancyja novaha najmieńnia padlahaje rehistracyi ŭ Ministerstvie achovy zdaroŭja, padčas jakoj ekśpierty paćviardžajuć jaje jakaść. Paśla rehistracyi substancyi pačynajecca novy etap — uznaŭleńnie technałohii, padbor aptymalnych technałahičnych paramietraŭ, vyvučeńnie stabilnaści preparata na praciahu terminu prydatnaści, praviadzieńnie vyprabavańniaŭ, jakija pravodziacca ŭ paraŭnańni z aryhinalnym preparatam. I tolki paśla taho, jak my damahlisia nieabchodnaj jakaści preparata, pačynajecca etap rehistracyi hatovaha lekavaha srodku, padčas jakoj preparat prachodzić šerah daśledavańniaŭ. Pieršaje — chimičny kantrol jakaści, zatym — kliničnyja daśledavańni. Usie daśledavańni pravodziacca na akredytavanych bazach Ministerstva achovy zdaroŭja. My źjaŭlajemsia tolki sponsarami. Daśledavańni ćviordych lekavych formaŭ pravodziacca na zdarovych dobraachvotnikach, jakija papiarednie daskanalna abśledujucca i strachujucca. I kali my damahlisia ekvivalentnaści, pačynajecca etap kančatkovaj rehistracyi. Pieršaja sieryja, vypuščanaja na pradpryjemstvie, padlahaje kantrolu jakaści ŭ Respublikanskaj kantrolna-analityčnaj łabaratoryi. Tolki paśla hetaha my atrymlivajem dazvoł na pramysłovy vypusk».
Biada našaha naroda ŭ tym, što antybijotyki prymajucca ź luboj nahody
«Syravinu my biarem u taho ž kitajskaha vytvorcy, u jakoha biare ŭvieś śviet, u tym liku Jeŭropa i Amieryka», — raskazvaje Vital Dzieraš. «Na siońnia praktyčna ŭsie substancyi dla antybijotykaŭ vyrablajucca ŭ dźviuch krainach — Kitai i Indyi. Heta vielmi brudnyja i ekałahična niespryjalnyja vytvorčaści. U raźvitych ža krainach antybijotyki nichto nie vyrablaje. Ja byvaŭ na niekatorych farmaceŭtyčnych pradpryjemstvach Indyi i Kitaja. Za dziesiać kiłamietraŭ ad ich užo pačynaješ adčuvać pach antybijotykaŭ. Tamu jak by vas ni pierakonvali, što toj ci inšy antybijotyk vyrableny ŭ Polščy, Hiermanii, Francyi ci jakoj-niebudź inšaj jeŭrapiejskaj krainie, — heta niapraŭda. Jon tolki rasfasavany tam na takim ža ŭnikalnym zvyšsučasnym italjanskim abstalavańni, jak i ŭ nas. Usie našy łabaratoryi akredytavanyja ŭ Biełarusi i majuć prava pa vynikach daśledavańniaŭ rabić zaklučeńnie, jakoje nosić kančatkovy charaktar».
Na pres-kanfierencyi ŭzhadali vypadak, kali ad vyrablenaha ŭ Barysavie preparata «Ceftryakson» zahinuła žančyna. Hiendyrektar padzialiŭsia svaim mierkavańniem na hety kont:
«My pastaŭlajem antybijotyki na zamiežny rynak užo 24 hady, i ŭ nas nikoli nie było nijakich surjoznych prablem. Ja liču, što ŭ hetym vypadku maje miesca «zamova» našych kankurentaŭ. Pryčyna śmierci — niepažadanaja reakcyja na antybijotyk. SAAZ dapuskaje adnu admoŭnuju reakcyju na dziesiać tysiač stanoŭčych. U hetaj žančyny nazirałasia alerhičnaja reakcyja i raniej, kali jana rabiła ŭkoły pacyjentam. I kali jana vyrašyła sabie ŭkałoć hety preparat pa-za miežami miedycynskaj ustanovy, nastupiła śmierć. I heta nie dziŭna. Śmierci zdaralisia i raniej, bo antybijotyk — heta ryzykoŭny preparat. Im lečać, kali dakładna vyznačana, ci nie budzie ad jaho bolš škody, čym karyści. Nielha pryznačać antybijotyki ź luboj nahody. Bo tym samym my pryvučajem da ich našy arhanizmy. Antybijotyki pavinny pryznačacca stroha ŭ lačebnych ustanovach i ŭžyvacca pad kantrolem lekaraŭ. I ni ŭ jakim razie nielha prymać ich bieskantrolna. Biada našaha naroda ŭ tym, što antybijotyki prymajucca ź luboj nahody. Nieabchodna pryščeplivać kulturu ich užyvańnia siarod našaha nasielnictva».
Ci horšy «Drotavieryn» za «No-špu»
Vital Dzieraš niezadavoleny, jak daktary i nasielnictva ŭsprymajuć našy preparaty, i ličyć, što pryčyna nie ŭ preparatach i ich jakaści, a ŭ staŭleńni da ich struktur, jakija zajmajucca realizacyjaj, asabliva kamiercyjnych, a taksama zacikaŭlenaść niekatorych daktaroŭ u łabiravańni intaresaŭ zamiežnych kampanij. «Ja nie mahu skardzicca na preparaty, vyrablenyja ŭ Jeŭropie. Tak, jany dobryja. Ale jany darahija. Chto choča — kuplajcie hetyja darahija preparaty. Ale naš «Drotavieryn» ničym nie horš za «No-špu». Heta toj ža preparat, vyrableny z taje ž syraviny».
I ŭsio heta tolki adzin Barysaŭski zavod. A jość ža jašče «Biełmiedpreparaty», «Lekfarm» i jašče bolš za 20 farmaceŭtyčnych pradpryjemstvaŭ!
Naprykancy razmovy Vital Dzieraš padzialiŭsia svaimi płanami na budučyniu: «Jość u nas adna mara — pieršymi ŭ Biełarusi zapuścić ułasnuju vytvorčaść substancyj, kab nie treba było zakuplać ich za miažoj».
A jakim lekam addajacie pieravahu vy? Dzialiciesia ŭ kamientarach, jakoje ŭ vas staŭleńnie da jakaści biełaruskich lekavych srodkaŭ i ich cen.
