Pasoł Ukrainy Ihar Kizim vykazaŭ ździŭleńnie z pryčyny vykliku ŭ Ministerstva zamiežnych spraŭ Biełarusi ŭ suviazi z «tendencyjnymi vykazvańniami ŭ ŚMI ŭ dačynieńni da vučeńniaŭ «Słavianskaje braterstva — 2017».
«Mnie škada, što žurnalist [partała] Tut.baj vychapiŭ z majho vystupu nie toje, što było tam hałoŭnym», — skazaŭ pasoł Kizim žurnalistam u časie pryjomu ŭ pasolstvie Ukrainy ŭ Minsku z nahody Dnia kanstytucyi Ukrainy. Pasoł adznačyŭ, što ŭvahu biełaruskaha dypłamatyčnaha viedamstva źviarnuŭ navat nie vystup, a replika z zały ŭ časie dyskusii na kanfierencyi, dzie jon prysutničaŭ u jakaści słuchača. Pasoł adznačyŭ i toje, što vyklik u MZS mieŭ miesca praz tydzień paśla publikacyi toj repliki.
«Mianie [na kanfierencyi] ździviła, što ŭkrainski vopyt uzhadali ŭ niehatyŭnym sensie, — raskazaŭ pasoł. — Moža być, maja pamyłka, što [reahujučy na heta] ja byŭ zanadta adkrytym, — pryznaŭ pasoł Ukrainy. — Ideja maja hałoŭnaja była — što treba bolš prazrystaści. Biełaruś, kali choča być pačutaja, pavinna dziejničać z bolšaj adkrytaściu. Kali na vučeńni «Zachad-2017» stolki ŭvahi, treba prajaŭlać asablivuju adkrytaść», — adznačyŭ pasoł.
Na pytańnie, ci jość va Ukrainy zakłapočanaść adnosna budučych vučeńniaŭ «Zachad-2017», pasoł Kizim adznačyŭ: «Možna daviarać tamu, što skazaŭ prezident Biełarusi. Zadekłaravana, što ź miežaŭ Biełarusi pahrozy Ukrainie nie budzie, — skazaŭ pasoł i dadaŭ. — Ale ja nie daviaraju rasijanam, bo ŭsie pahadnieńni z Ukrainaj byli Rasijaj parušanyja».
Na pytańnie adnosna zatrymańnia hramadzianina Biełarusi ŭ Čarnihavie pa padazreńni ŭ špijanažy suprać Ukrainy, pasoł spasłaŭsia na aficyjnuju infarmacyju, što hety čałaviek padazrajecca ŭ pracy na Rasiju.
Na pytańnie ab padrychtoŭcy vizitu Alaksandra Łukašenki va Ukrainu ambasadar Kizim adkazaŭ, što jana idzie zhodna z płanam na ŭzroŭni pracoŭnych hrup. Padčas vizitu maje adbycca biełaruska-ŭkrainski biznes-forum, a taksama maje być padpisany šerah pahadnieńniaŭ. «Lvinaja dola budzie pryśviečanaja ekanamičnym adnosinam, — adznačyŭ dypłamat. — Heta raźvićcio damoŭlenaściej [dasiahnutych Alaksandram Łukašenkam i Piatrom Parašenkam na sustrečy] u Laskavičach», — skazaŭ ambasadar Kizim.
Varta adznačyć, što vizit Alaksandra Łukašenki maje adbycca da kanca leta, h.zn. pierad pryznačanymi na vierasień vučeńniami «Zachad-2017», i taki tajminh moža rasceńvacca jak žadańnie Minska pakazać, što dadzienyja vučeńni nie skiravanyja suprać Ukrainy.
