U deputaty iduć usiaho 365 hramadzianaŭ, heta ŭ dva razy mieniej, čym čatyry hady tamu. U Vaŭkavysku, Ivacevičach dy Pinskaj i Maładačanskaj viaskovaj akruhach vybary projduć na biezalternatyŭnaj asnovie. Źnialisia kandydaty ad ADS u Lepielskaj, Navapołackaj i Viciebskaj Čyhunačnaj akruhach.
18 žniŭnia skončyłasia padača dakumentaŭ dla rehistracyi kandydatami ŭ deputaty pałaty pradstaŭnikoŭ. Pravierka praciahniecca da 28 žniŭnia. Paśla čaho i stanuć viadomyja vyniki rehistracyi. Varta adznačyć, što bolšaść demakratyčnych kandydataŭ hodna spravilisia z etapam zboru podpisaŭ. Z dystancyi syšło ŭsiaho niekalki čałaviek.
Nie daličyłasia dvuch svaich vyłučencaŭ AHP. Kandydata Navahradzkaj vybarčaj akruzie Jurja Istomina, ź jahonych słovaŭ, u paniadziełak pa abiedzie zatrymali razam ź niekalkimi siabrami inicyjatyŭnaj hrupy. U pastarunku ich pratrymali bolš za try hadziny. Takim čynam milicyjanty nie tolki pieraškodzili zboru podpisaŭ, ale i pazbavili Jurja Istomina mahčymaści ich zaćvierdzić.
Druhi vypadak zafiksavany ŭ Maładečanskaj viaskovaj akruzie. «Našamu kandydatu Ŭładzimieru Źvierniku raźbili mašynu. Jon vyrašyŭ, što nastupnym razam mohuć raźbić hałavu, tamu syšoŭ z dystancyi», — kaža staršynia AHP Anatol Labiedźka.
Labiedźka zaznačaje, što ADS staviła pierad uładami ŭmovy dla ŭdziełu ŭ vybarach. «Heta ŭklučeńnie našych ludziej u vybarčyja kamisii, rehistracyja pradstaŭnikoŭ apazycyi, spynieńnie represij. Jak bačym, pieršaja ŭmova ŭžo nia vykananaja. Pahladzim jak budzie padčas rehistracyi. Što da spynieńnia represijaŭ, to ja b skazaŭ, što šklanka napałovu pustaja. Ucisk na siabroŭ inicyjatyŭnych hrupaŭ našych kandydataŭ jość, chaj i nie taki vialiki jak padčas minułych kampanij», — praciahvaje A.Labiedźka.
Dva čałavieki syšli ŭ sacyjał-demakrataŭ. Navapałačanin Ihar Valajeŭ byŭ vymušany źniacca praz ucisk na pracy, jon pracuje aparatčykam cechu na «Palimiry». Praz stan zdaroŭja admoviŭsia ad udziełu ŭ vybarach Anatol Šapavałaŭ, što mieŭsia balatavacca pa Viciebskaj Čyhunačnaj akruzie.
Jość adna strata i ŭ niezarehistravanaha BCHD. U Alaksieja Aleksandroviča ź Lepielu atrymałasia sytuacyja jak u Istomina. Aktyvist byŭ zatrymany milicyjaj padčas sustrečy ź siabrami svajoj inicyjatyŭnaj hrupy. Padać dakumenty ŭ rajonny vybarkam nie atrymałasia.
PKB i Partyja BNF strataŭ na dadzienym etapie nia majuć. Zrešty, frontaŭcy taksama sutyknulisia ź nievialikaj prablemaj. Pa słovach jurysta partyi Ŭładzimiera Łabkoviča, u aŭtorak Minjust zapatrabavaŭ ciaham adnych sutak padać usie nieabchodnyja dakumenty ab pracy źjezdu. U advarotnym vypadku moža być skasavanaja rehistracyja Valera Pucickaha (Rečyca), Mikałaja Leščuna (Łahojsk), Siarhieja Antusieviča (Haradzienskaja-Centralnaja akruha), Uładzimiera Kazieki (Dniepra-Buhskaja).
Lider BSDH Stanisłaŭ Šuškievič kaža, što ad jaho partyi dakumenty na rehistracyju padali tolki piać čałaviek, chacia raźličvali na kudy bolšuju ličbu. «Heta pakazała, što našy partyjcy mnoha abiacajuć, ale mała robiać», — zaznačyŭ S.Šuškievič.
U pryvatnaści, z vybarčaj honki syšoŭ były palitviazień, siabra BSDH Siarhiej Skrabiec, jaki chacieŭ balatavacca ŭ Lidzie. Pa słovach Skrabca, hetaje rašeńnie było pryniataje paśla taho, jak na siabroŭ jahonaj kamandy pačaŭ akazvacca niemały cisk.
Pa štandarami «Eŭrapiejskaj kaalicyi» baraćbu praciahvajuć 51 čałaviek. «Spačatku my planavali vyłučyć 75 čałaviek, na rehistracyju inicyjatyŭnych hrup pryjšło 65 kandydataŭ, ciapier zastałosia krychu bolej za paŭsotni. Na kožnym etapie vybarčaj kampanii hublajem kala 20% svaich ludziej», — zaznačaje lider «eŭrapiejcaŭ» Mikoła Statkievič.
Były palitviazień pryznajecca, što niekatoryja siabry kaalicyi prosta nie zmahli sabrać patrebnaj kolkaści hałasoŭ. Leanid Skarabahaty ŭ Miensku nia zmoh zarehistravacca praz razhildziajstva adnaho ź siabroŭ inicyjatyŭnaj hrupy, jaki spačatku zabyŭsia doma pašpart, a paśla spaźniŭsia ŭ vybarkam na 15 chvilin. Źmitra Šymajtesa z Baranavickaj viaskovaj akruhi źniacca paprasili partniory pa biznesie, kab u ich nie było lišnich prablem. Niama peŭnaści i z samim Statkievičam, zarehistravać jakoha ci to možna ci niamožna praź niaźniatuju palityčnuju sudzimaść. U vypadku nierehistracyi Statkievič abiacaje źviarnucca ŭ Viarchoŭny sud.
Ahułam Eŭrapiejskaja kaalicyja sabrała, sa słovaŭ Statkieviča, 107 tysiač podpisaŭ.
Nievialikuju trochchadoŭku praviali demakraty ŭ Miensku. Tolki ŭ apošni dzień vyznačyŭsia z svaim kančatkovym farmatam udziełu ŭ parlamenckich vybarach staršynia AHP Anatol Labiedźka. U paniadziełak jon zdaŭ «tysiačy podpisaŭ» u vybarkam staličnaj Staravilenskaj akruhi. Nahadajem, što palityk zarehistravaŭ dźvie inicyjatyŭnyja hrupy pa zboru podpisaŭ. Druhaja pracavała ŭ Sucharavie. Zamiest Labiedźki ŭ Sucharavie budzie balatavacca dačka byłoha palitviaźnia Alaksandra Kazulina Volha, jejnuju ž Adzincoŭskuju akruhu zojmie Vital Rymašeŭski, za jakim pieršapačatkova była Staravilenskaja akruha.
Alaksandar Milinkievič padčas pajezdak pa rehijonach jak siabar inicyjatyŭnych hrup patencyjnych kandydataŭ ŭ deputaty naviedaŭ 24 harady i ŭziaŭ udzieł u zbory podpisaŭ za 32 kandydataŭ.
«Podpisy źbiralisia zaraz značna lahčej, čym padčas inšych kampanij», — adznačyŭ eks-kandydat na pasadu prezydenta. Nastupny raŭnd pajezdak Milinkieviča pa rehijonach zaplanavany na pačatak vieraśnia, kali pačniecca ahitacyjnaja kampanija.
Uvohule ž deputatami chočuć stać 365 hramadzianaŭ, heta amal u dva razy mieniej, čym čatyry hady tamu.
U vybarkamach Bieraściejščyny lažać dakumenty ad 47 zajaŭnikaŭ (na 16 akruhaŭ), Viciebščyny — ad 37 (na 14 akruhaŭ), Homielščyny — ad 51 (na 17), Haradzienščyny — ad 34 (na 13), Mahiloŭščyny — ad 51 (na 13), Mienščyny — ad 42 (na 17). U Miensku 103 kandydaty pretendujuć na 20 akruhaŭ.
U Vaŭkavysku, Ivacevičach, Maładečanskaj i Pinskaj viaskovych i jašče ŭ dźviuch akruhach užo ciapier peŭna, što vybary projduć na biezalternatyŭnaj asnovie. U ADS prahnazujuć, što ciaham kampanii kolkaść takich akruh moža pavialičycca. Kiraŭnica CVK Lidzija Jarmošyna pryznała, što «aktyŭnaść partyj upała praktyčna ŭ try razy». Naprykład, partyja Hajdukieviča zaŭždy aktyŭničała, «faktyčna stvarała asnoŭnuju masoŭku», a ciapier navat jana vyłučyła tolki 7 kandydataŭ.
Varta nahadać, što na vybarach 2004 hodu ŭ kamisii ŭvachodziła ŭsiaho 0,2% niezaležnych siabroŭ. Sioleta hetaja ličba ŭvohule składaje 0,07%.
