Da prysudu fihurantam spravy «čornych ryełtaraŭ» u Mahilovie — roŭna miesiac. Dziaržabvinavačańnie zapatrabavała dla abvinavačanych Ihara Hieršankova i Siamiona Bieražnoha vyšejšuju mieru — śmiarotnaje pakarańnie. Dla Taćciany Hieršankovoj — 24 hady turmy, dla Barysa Kaleśnikava — 22 hady strohaha režymu.
Siońnia, 21 červienia, abvinavačanyja vystupili sa svaim apošnim słovam, paviedamlaje Tut.by.
Słuchańnie rezanansnaj spravy prachodzić u Mahiloŭskim abłasnym sudzie vośmy miesiac. Na łavie padsudnych — čatyry čałavieki. Siamionu Bieražnomu, Iharu i Taćcianie Hieršankovym vystaŭlenaje abvinavačvańnie ŭ zabojstvach, vykradańni čałavieka, a taksama machlarstvie, razboi, vymahalnictvie, kradziažy abo źniščeńni dakumientaŭ. Muž i žonka abvinavačvajucca taksama ŭ niezakonnym abarocie narkotykaŭ abo psichatropaŭ (zachoŭvańni biez mety zbytu). Barysa Kaleśnikava abvinavačvajuć u razboi, dapamahańni pry ździajśnieńni zabojstva, dapamahańni ŭ vykradańni čałavieka.
Pavodle danych śledstva, złamyśniki dziejničali ŭ 2009-2015 hadach. Jany pierakonvali ŭłaśnikaŭ kvater pradać majomaść, a paśla hetaha raspraŭlalisia ź imi. Na mohiłkach u Mahiloŭskaj vobłaści było znojdziena šeść pachavańniaŭ i jašče try jamy, pryhatavanyja dla budučych achviar. Niekatorych, jak prahučała ŭ chodzie sudovaha pasiadžeńnia, zakopvali žyŭcom: čałaviek u hety čas spaŭ pad uździejańniem harełki i kłafielinu.
Prysud abvieściać 21 lipienia.
