Spyniŭšysia ŭ superhateli rasiejskaha miljardera Dzierypaski, A. Łukašenka pavioŭ uschodniuju dyplamatyčnuju hulniu na składanych pieramovach z prezydentam Miadźviedzievym u Sočy. Miadźviedzieŭ: spačatku rakiety, paśla haz. Łukašenka: spačatku haz, paśla rakiety.
U aŭtorak u Sočy adbylisia pieramovy miž kiraŭnikami Biełarusi i Rasiei Alaksandram Łukašenkam i Dźmitryjem Miadźviedzievym. Admietna, što ab samoj sustrečy 14 žniŭnia ŭpieršyniu zajaviŭ Uładzimier Pucin padčas sustrečy ź biełaruskim kaleham Siarhiejem Sidorskim. Ich razmova prachodziła za začynienymi dźviaryma. Rasiejski premjer nibyta pieradaŭ vyrašeńnie «biełaruskich prablem» Miadźviedzievu.
«Dźmitryj Anatoljevič čakaje. Na sustrečy buduć pradoŭžany pieramovy pa ŭsim kompleksie pytańniaŭ», — adznačyŭ Pucin.
Takim čynam Łukašenku ŭ śpiešcy daviałosia pieraviorstvać svoj pracoŭny hrafik. Užo na nastupny dzień paśla sustrečy Sidorskaha z Pucinym kiraŭnik Biełarusi vylecieŭ u Krasnadarski kraj.
Jak adznačaje «Komsomolskaja pravda», u Sočy Łukašenka spyniŭsia nie ŭ svajoj tradycyjnaj rezydencyi ŭ Krasnaj palanie, a ŭ šykoŭnym hateli «Radzima», jaki naležyć rasiejskamu aliharchu biełaruskaha pachodžańnia Alehu Dzierypasku. Vydańnie taksama adznačała, što na kurort Łukašenka hetym razam prylacieŭ biaz rodnych i artystaŭ, a tolki z aficyjnaj delehacyjaj.
Mała ŭ kaho byli sumnievy, što sustreča budzie nasić žorstki i bieskampramisny charaktar. Što Rasieja budzie dabivacca ŭstalavańnia ŭ Biełarusi rakietnych kompleksaŭ, a Łukašenka pasprabuje vyjhrać tańniejšyja ceny na paliva.
Miadźviedzieŭ adrazu prapanavaŭ svajmu kalehu abmierkavać nia tolki sacyjalnyja i ekanamičnyja pytańni, ale i mižnarodnyja prablemy. U pryvatnaści, «tuju ahresiju, jakaja była ździejśniena Hruzijaj».
I Łukašenku, jaki zachoŭvaŭ u hetym pytańni amal cnatlivaje maŭčańnie, pryjšłosia prahinacca: «Usio było zroblena vydatna, vielmi spakojna, mudra i pryhoža», — vykazaŭsia Łukašenka. Dastałasia i amerykancam, i zachodnim krainam, jakich biełaruski lider nazvaŭ «niedalokimi ludźmi». Źviarnuła ŭvahu, što nie «šałudzivymi».
Miadźviedzieŭ akcentavaŭ uvahu, što ci nie najhałoŭnym dla jaho pytańniem źjaŭlajecca «supracoŭnictva ŭ ramkach ADKB». Havorka, napeŭna, tut idzie pra baziravańnie ŭ Biełarusi rakietnych kompleksaŭ «Iskander‑M» jak adkaz na ŭstanoŭku elementaŭ SPA ZŠA ŭ Polščy i Čechii. «Nam treba nadalej padumać, jak dalej reahavać na heta», — pieradajuć słovy Miadźviedzieva rasiejskija infarmacyjnyja ahienctvy.
«Nadyšoŭ momant dla niaprostych dziejańnia ŭ ramkach sajuznaj dziaržavy. Čas prosty dziejańniaŭ užo skončyŭsia», — adkazaŭ na heta kiraŭnik Biełarusi.
Była dasiahnutaja damoŭlenaść ab praviadzieńni najvyšejšaje dziaržaŭnaje rady sajuznaj dziaržavy, jakaja najchutčej projdzie ŭžo paśla parlamenckich vybaraŭ u Biełarusi — vynik ich pradkazalny.
Łukašenka i Miadźviedzieŭ damovilisia vyrašyć pytańnie ab stvareńni adzinaj systemy supraćpavietranaj abarony, damova pra jakuju i budzie padpisanaja ciaham nastupnaha pasiedžańnia. Heta daje ŭ ruki A. Łukašenku važny ryčah dla šantažu Zachadu — kali nie pryznajecie lehitymnaść vybaraŭ takich, jakimi jany buduć, padpišu abjadnańnie systemaŭ SPA. Rasieja taho damahajecca ŭžo mnoha hadoŭ. I rašeńnie cany na haz na 2009 hod, adpaviedna, taksama adkładajecca na paźniejšy čas.
Nastupnaja ž sustreča Miadźviedzieva i Łukašenki projdzie ŭžo 5 vieraśnia ŭ Piacihorsku na sesii ADKB.
Voś i ŭsia infarmacyja, dastupnaja z Sočy.