22 maja ministry sielskaj haspadarki i charčavańnia Rasii i Biełarusi damovilisia ab źniaćci abmiežavańniaŭ na pastaŭki biełaruskaj pradukcyi z 9 pradpryjemstvaŭ. Praź niekalki dzion praciahnucca pieramovy pa inšych pradpryjemstvach, dla jakich pakul rasijski rynak zakryty.
Čamu abmiežavańni źniali tolki pieravažna na celnamałočnuju pradukcyju, a dla astatniaj zachavali embarha ŭ intervju «Sielskaj haziecie»raskazaŭ ministr sielskaj haspadarki i charčavańnia Biełarusi Leanid Zajac.
Leanid Zajac. Fota: ww.sb.by
— Raśsielhasnahlad ličyć, što nibyta ŭ joj źjavilisia antybijotyki. Usio heta nadumanaje i nie paćviardžajecca realnymi faktami. Vychodzić paradoks: u adnoj pradukcyi pradpryjemstva jany jość, u druhoj niama. Ale ŭ małočnych kambinataŭ pastajannyja syravinnyja zony.
I kali antybijotyki nie vyjaŭlajuć u małace, kiefiry, śmiatanie, to ich nie moža być i ŭ syry ci maśle. Ale z pradstaŭnikami Raśsielhasnahladu vielmi składana havaryć, tym bolš pierakonvać u čymści, — raskazaŭ ministr.
Jon adznačyŭ, što na pieramovach abstanoŭka pa-raniejšamu składanaja, ale biełaruski bok «dziejničaje, nastojvaje, pierakonvaje». Prahres pakul nievialiki.
Prakamientavaŭ Leanid Zajac i ŭviedzienyja z 24 maja novyja abmiežavańni na pastaŭku pradukcyi, a taksama ŭzmacnieńnie łabaratornaha kantrolu pradukcyi niekatorych pradpryjemstvaŭ.
— Uzmocnicca nahlad za pradukcyjaj jak z rasiejskaha, tak i z našaha boku. Daśledavacca budzie kožnaja partyja tavaru. Akramia taho, bolš pilnym stanie kantrol na ŭsich stadyjach vytvorčaści: ad syraviny da hatovaj pradukcyi. U vypadku, kali ŭ rasiejcaŭ źjaviacca zaŭvahi, jany mohuć zakryć pradpryjemstva całkam dla pastavak u ich krainu.
U samoha ministra niama pretenzij da padnačalenych jamu zavodaŭ i kambinataŭ:
— Ja nie baču padstaŭ dla taho, kab paprakać choć adnaho biełaruskaha pierapracoŭščyka u tym, što jon vypuskaje niajakasny tavar. Zaŭvahi mohuć być rabočaha paradku, ale jany nijak nie tyčacca biaśpieki vyrablenych praduktaŭ charčavańnia.
Ministr adznačyŭ, što biełaruski bok praciahnie pracu pa adkryćci astatnich pradpryjemstvaŭ dla Rasii.
— Nieŭzabavie znoŭ praviadziem pieramovy pra heta. Pryčym budziem nastojvać, kab dazvolili pastaŭki ŭsioj pradukcyi.
