Rašeńnie ab praniknieńni supracoŭnikaŭ pravaachoŭnych orhanaŭ biez dastatkovych padstaŭ u žyłoje pamiaškańnie, dzie znachodziŭsia staršynia Aršanskaha rajvykankama, było pryniata peŭnymi słužbovymi asobami Viciebskaj vobłaści. Pra heta BiełTA paviedamili ŭ Administracyi prezidenta sa spasyłkaj na vyniki pieršasnaj pravierki.
«Incydent adbyŭsia na minułym tydni. Jak vynikaje z tłumačeńniaŭ staršyni rajvykankama, u siłu znachodžańnia ŭ chvaravitym stanie, niekatory čas jon nie vychodziŭ na suviaź. Pradstaŭniki pravaachoŭnych struktur pranikli ŭ dom, dzie znachodziŭsia Leanid Piańkoŭski, z metaj vyznačeńnia jaho miescaznachodžańnia. Staršynia rajvykankama ŭ toj momant znachodziŭsia pa miescy pražyvańnia svajakoŭ u horadzie Oršy», — raspaviali ŭ Administracyi.
Acenku faktu praniknieńnia ŭ dom asoby, jakaja znachodzicca ŭ kadravym rejestry kiraŭnika dziaržavy, ciapier daje Śledčy kamitet.
Nahadajem, što siońnia Alaksandr Łukašenka na sustrečy sa staršynioj Śledčaha kamiteta aburyŭsia: «Chto daŭ prava da čałavieka, uzhodnienaha da pryznačeńnia prezidentam, uryvacca ŭ dom? Bo dla taho, kab pravaachoŭnym orhanam navat vieści niejkija rasśledavańni pa čałavieku, jaki ŭvachodzić u kadravy rejestr prezidenta, treba zhoda prezidenta. Uvarvalisia, pačali niešta ŭdakładniać. Novy čałaviek pryjšoŭ pracavać. Taŭro na im pastavili. Niadobry sihnał. … Materyjały ŭžo jość. Raźbiaryciesia. Mnie patrebna mužčynskaja, sapraŭdnaja acenka hetaj situacyi», — dadaŭ Łukašenka.
Piańkoŭski byŭ pryznačany na pasadu staršyni Aršanskaha rajona 12 maja 2017 hoda.
