Rasiejskija tanki pierajšli miažu Hruzii
Aficyjnaja Maskva nazyvaje heta «aperacyjaj pa prymusie da miru».
Usiu noč u Cchinvali praciahvalisia bai miž hruzinskimi i rasiejskimi vojskami. Rasija padciahnuła ŭ Cchinvali kalonu braniatechniki i pierakinuła tudy 76-ju dyviziju Pavietrana-desantnych vojskaŭ.
Za noč Rasieja naniesła taksama bombavyja ŭdary pa hruzinskim porcie Poci, čyhunačnym vuźle Senaki, aeraporcie Kutaisi, horadzie Hory, Kadorskaj ciaśninie i — paŭtorna — pa vajskovaj bazie Vazijani pad Tbilisi. Ahulnaja kolkaść achviaraŭ nieviadomaja. Viadoma, što tolki ŭ Senaki, dzie ŭdar byŭ naniesieny pa čyhunačnym vuźle i vajskovaj častcy, zahinuła 12 čałaviek.
Tbilisi źviarnuŭsia da śvietu z dramatyčnym zaklikam abaranić suverenitet i terytaryjalnuju cełasnaść krainy.
Žorstkija sutyknieńni praciahvajucca na paŭdniovaj uskrainie Cchinvali. Bai ŭznavilisia paśla zacišša, jakoje praciahvałasia ŭ piatnicu ŭdzień niekalki hadzinaŭ.
Rasieja spyniła pavietranyja znosiny z Hruzijaj. A Hruzija spyniła viaščańnie rasiejskich telekanałaŭ.
Prezydent Hruzii Michaił Saakašvili zajaviŭ učora ŭviečary, što Paŭdniovaja Asiecija znachodzicca pad kantrolem hruzinskich vojskaŭ i što jana całkam ačyščanaja ad banfarmavańniaŭ.
Pavodle Saakašvili, Cchinvali byŭ «całkam ačyščany ad asiacinskich separatystaŭ i bandfarmavańniaŭ», chacia mocna paciarpieŭ ad avijacyjnych udaraŭ rasiejskich pavietranych siłaŭ. Straty hruzinskaha boku składajuć 30 čałaviek, skazaŭ Saakašvili.
Rasiejskija vajskoŭcy paviedamili pra bolš jak 10 zabitych i 30 paranienych bajcoŭ miratvorčych sił. Naziralniki na miescach paviedamlajuć, što straty rasiejskich vojskaŭ mohuć być vyšejšymi.
Prarasiejski lider Asiecii Eduard Kakojty zajaviŭ, što kolkaść zabitych składaje 1 400 čałaviek. Možna mierkavać, što bolšaść ź ich — mirnyja žychary.
Paśla načnych bombavych udaraŭ pa čatyroch haradach Hruzii ŚMI paviedamili, što kaŭkaskaja kraina rychtuje ŭviadzieńnie vajennaha stanovišča.
Pavodle ministra zamiežnych spravaŭ Hruzii Eki Tkiešełašvili, Hruzija zaklikała suśvietnych lideraŭ učynić cisk na Maskvu, kab spynić, jak jana zaznačyła, «adkrytuju vajennuju ahresiju» suprać Hruzii.
Kiraŭnik prahruzinskaha ŭradu Asiecii Dźmitry Sanakojeŭ učora źviarnuŭsia da hruzinskaha i asiacinskaha nasielnictva rehijonu z zaklikam dapamahać zakonnym uładam. Jak viadoma, u zacisnutym u harach rehijonie žyvie kala 80 tysiač čałaviek, ź ich kala 45 tysiač asiacinaŭ i 30 tysiačaŭ hruzinaŭ.
Dziaržsakratarka ZŠA Kandaliza Rajs zaklikała Rasieju vyvieści vojski z Hruzii i spynić avijanaloty ŭ zonie kanfliktu. «My prosim Maskvu nie bambić Hruziju, pavažać jaje terytaryjalnuju cełasnaść i adklikać vojski z krainy», — havoryć jaje piatničnaje paviedamleńnie.
Heta pieršy vypadak u postsavieckaj historyi, kali Rasieja adkryta ŭvodzić svaje vojski na terytoryju susiedniaj dziaržavy biez farmalnaj zhody jaje ŭradu. Aficyjnaja Maskva nazyvaje heta «aperacyjaj pa prymusie da miru».
Pakolki mižnarodnaje prava nie praduhledžvaje padstavaŭ dla ŭvodu vojskaŭ na terytoryju susiedniaj dziaržavy, Maskva padaje heta ŭsio jak humanitarnuju aperacyju, a nia sprobu zachapić častku terytoryju susiedniaj dziaržavy.
Varta adznačyć, što
Rasieja maje hihanckuju pieravahu nad Hruzijaj va ŭzbrojenaj sile i technicy.
Vojski Paŭnočna-Kaŭkaskaje vajskovaje akruhi naličvajuć 100 tysiačaŭ čałaviek. Na ŭzbrajeńni jany majuć kala 620 tankaŭ, 200 BMP i 875 artyleryjskich systemaŭ, u tym liku reaktyŭnych systemaŭ załpavaha ahniu. Da taho ž, Rasija ŭzbroiła i finansuje asiacinskija i abchaskija ŭzbrojenyja častki. U toj ža usia armija Hruzii składajecca z 35 tysiač čałaviek i maje na ŭzbrajeńni 123 tanki. Kab akazać bolš surjozny supraciŭ Rasiei, Hruzija abvieściła pra vyvad svajho dvuchtysiačnaha kantynhientu ź Iraku i źviarnułasia da ZŠA z prośbaj ab transpartavańni vajskoŭcaŭ na radzimu.
Dyplamaty i eksperty vahajucca ŭ svaich prahnozach dalejšaha raźvićcia sytuacyi, ale možna z peŭnaściu skazać, što hety kanflikt adterminuje pryniaćcie Hruzii ŭ NATO, jakoha kraina tak dabivałasia.
Unačy z čaćviarha na piatnicu hruzinskija vojski ŭvajšli na terytoryi, što ad 1992 hodu nie padparadkoŭvalisia Tbilisi. Hetamu papiaredničaŭ tydzień uzajemnych abstrełaŭ i abvinavačvańniaŭ.
Napiaredadni aperacyi prezydent Hruzii Michaeł Saakašvili vystupiŭ z poŭnym dramatyzmu zaklikam da spynieńnia kanfliktu i adnaŭleńnia cełasnaści Hruzii.
U telezvarocie jon prapanavaŭ lideram Paŭdniovaj Asiecii «nieadkładna spynić ahoń i raspačać pieramovy». Jon paabiacaŭ im aŭtanomiju ŭ składzie Hruzii i skazaŭ, što Rasieja mahła b vystupić harantam takoj aŭtanomii.
Nijakaha adkazu z Cchinvali, viadoma, nie było — asiaciny ŭžo 16 hadoŭ nastojvajuć na adździaleńni ad Hruzii i pierachodzie ŭ skład Rasiei.
Za niekalki chvilinaŭ da poŭnačy Hruzinskaje TV abvieściła ab pačatku «aperacyi pa adnaŭleńni kanstytucyjnaha paradku».
Vojski Hruzii ryŭkom zaniali 11 siołaŭ iCchinvali.
Asiacinskija pazycyi byli źmiatyja. Zaciaty boj razhareŭsia ŭ paŭdniovaj častcy horadu, dzie suprać hruzinskich vojskaŭ adkryta vystupili rasiejskija miratvorcy. Užyvalisia tanki i artyleryja.
Infarmacyja z pola bajoŭ dachodziła supiarečlivaja. Miarkujučy pa ŭsim, hruzinskija vajskoŭcy svaim ahniom całkam źniščyli abarončuju infrastrukturu Paŭdniovaj Asiecii. Hruzinskija vojski pakazali, što ich bajazdolnaść rezka vyrasła za apošnija hady.
U Cchinvali žyvie kala 30 tysiač čałaviek — prykładna jak u rajcentry pamieram z našu Biarozu.
Premjer Rasiei Pucin zajaviŭ uranku ŭ piatnicu, što «ahresija Hruzii atrymaje adkaz».
Pad abied z boku miažy da Cchinvali rušyła kalona rasiejskaj braniatechniki ŭ składzie sta adzinak. Spačatku Pucinym było zajaŭlena, što na tankach i broniemašynach na padmohu asiacinam ruchajucca «dobraachvotniki». Adnak paśla Paŭnočnakaŭkaskaja vajskovaja akruha abvieściła, što heta hrupiroŭka rasiejskich vojskaŭ, vypraŭlenaja na padmacavańnie miratvorčych siłaŭ.
Pry nabližeńni rasiejskaje kalony hruzinskija častki adyšli ad Cchinvali na vyšyni vakoł horadu.
Sam horad pałychaje, pažary nichto nia hasić. U žorstkich bajach razburanaja bolšaja častka žyłoha fondu.
Rasiejskija samaloty bambili pazycyi hruzinskich vojskaŭ u Hory i vajskovuju bazu Vazijani pad Tbilisi — na jakoj bazujucca taksama amerykanskija vajskovyja instruktary. Hruzija zajaviła ab źbićci dvuch rasiejskich samalotaŭ, adnak infarmacyja nie była paćvierdžanaja dakumentalna. Pad viečar źjaviłasia infarmacyja, što
rasiejskija samaloty nanieśli novy ŭdar pa vajskovaj bazie ŭ horadzie Marneuli na poŭdzień ad Tbilisi. 4 čałavieki zahinuli.
Rasija pajšła na biesprecedentny krok — pasłała vojski ŭ susiedniuju krainu, paśla taho jak dyplamatyčnyja kroki Kramla sustreli chałodnuju reakcyju Zachadu. Rada biaśpieki AAN nie pryniała nijakaha rašeńnia pa sytuacyi ŭ Paŭdniovaj Asiecii. Terminovaje pasiedžańnie było sklikanaje siońnia ŭnačy na prośbu Rasiei, ale inšyja siabry Rady nie padtrymali rasiejskich prapanovaŭ.
Na pasiedžańni Hruzija całkam uskłała vinu za abstreły na paŭdniovaasiacinski bok. Heta zajaviŭ na Radzie Biaśpieki AAN stały pradstaŭnik Hruzii pry AAN Irakli Ałasanija. «My zaklikajem lideraŭ separatystaŭ spynić vajennyja dziejańni», — zajaviŭ jon. Jon taksama zaklikaŭ Rasieju spynić pravakacyi i ŭmiašańnie va ŭnutranyja spravy Hruzii.
Asiacinskaja armija składajecca ź miascovych ludziej, ale taksama z dobraachvotnikaŭ z Rasiei. U Cchinvali prybyŭ taksama kiraŭnik rasiejskaj aŭtanomii Paŭnočnaja Asiecija Tajmuraz Mamsuraŭ.
Pradstaŭnik Paŭdniovaj Asiecii ŭ Maskvie zaprasiŭ siońnia ŭ Rasiei terminovaj vajskovaj dapamohi. Paśla hetaha Pucin u Pekinie zajaviŭ: «pačałasia vajna».
Jak viadoma, Asiecija raniej prasiłasia ŭ skład Rasiei. Heta dało Tbilisi dadatkovyja padstavy ličyć, što jano maje spravu nie z aŭtanamisckim rucham, a z zakamuflavanym rasiejskim umiašańniem.
ZŠA i Eŭrasajuz zaklikali nieadkładna spynić bajavyja dziejańni.
Pa atrymańni naviny ab bambiožcy bazy Vazijani i ŭstupleńni rasiejskaj braniatankavaje kalony ŭ Asieciju Michaeł Saakašvili źviarnuŭsia da ZŠA z prośbaj ab padtrymcy.
«Chaču źviarnucca da mižnarodnaj supolnaści i da Rasijskaj Federacyi z zaklikam — nieadkładna spynić bambiožku Hruzii. Hruzija nie była inicyjataram hetaj kanfrantacyi, ale Hruzija nie adstupicca svajoj terytoryi, — zajaviŭ u čarhovym telezvarocie Saakašvili. Jon abjaviŭ taksama mabilizacyju rezervistaŭ. — My baronim Hruziju i našu budučyniu», — zajaviŭ jon. «Toje, što adbyłosia, heta vynik histeryčnaje militarysckaje prapahandy, razhornutaje rasiejskimi telekanałami», — zajaviŭ prezydent Hruzii, zaklikaŭšy Rasieju «supolnymi namahańniami spynić hetaje šalenstva».
ŚMI Rasii i Hruzii poŭniacca prapahandysckimi materyjałami na temu kanfliktu.
Tak na našych vačach jašče adzin rehijon spoŭz da kryvavaha kanfliktu. Pytańnie «kamu heta vyhadna» zastajecca biez adkazu.
Biełaruś zachoŭvaje nejtralitet u acenkach sytuacyi. Staršynia kamisii pa mižnarodnych spravach savietu respubliki nacyjanalnaha schodu Mikałaj Čarhiniec siońnia zajaviŭ, što kanflikt moža być vyrašany tolki praz sklikańnie samitu SND. Jon nia staŭ uskładać adkaznaść za pralićcio kryvi na jakiści adzin bok. MZS Biełarusi zaklikaŭ da nieadkładnaha spynieńnia ahniu.
