U starejšaj dački prezidenta ZŠA Donalda Trampa Ivanki Tramp budzie svoj pracoŭny kabiniet u Biełym domie, paviedamili ŭ Vašynhtonie. Pry hetym aficyjna 35-hadovaja dačka prezidenta nie budzie zajmać nijakaj pasady ŭ jaho administracyi, piša VVS.
Ivanka Tramp prysutničała na pieramovach svajho baćki z premjer-ministram Kanady Džaścinam Trudo… Fota AFP
Vydańnie Politico, spasyłajučysia na jurysta Ivanki Tramp Džejmi Harelika, paviedamiła, što ŭ dački prezidenta budzie dostup da sakretnaj infarmacyi, faktyčna jana budzie vykonvać rolu daradcy prezidenta, a jaje hałoŭnaja zadača — być «vačami i vušami» svajho baćki.
Paviedamlajecca, što ofis Ivanki budzie raźmiaščacca ŭ zachodnim kryle Biełaha doma, dzie znachodzicca Avalny kabiniet.
…i kancleram Hiermanii Anhieły Mierkiel. Fota JERA
Ivanka prysutničała na mnohich sustrečach svajho baćki z suśvietnymi lidarami, u tym liku na pieramovach z premjer-ministram Kanady Džaścinam Trudo i kancleram Hiermanii Anhiełaj Mierkiel.
Sa słoŭ jaje jurysta Džejmi Harelika, prysutnaść Ivanki ŭ Biełym domie nie parušaje amierykanskaha zakanadaŭstva, nakiravanaha na baraćbu ź niepatyzmam, bo jana nie zajmaje nijakaj aficyjnaj pasady i nie atrymlivaje zarpłatu, a vykonvaje abaviazki daradcy na dobraachvotnych pačatkach.
Raniej vialiki rezanans vyklikała rašeńnie Trampa pryznačyć svajho ziacia Džareda Kušniera — muža Ivanki Tramp — na pasadu starejšaha daradcy ŭ Biełym domie.
Krytyki hetaha rašeńnia adznačali, što ŭ Kušniera niama dypłamatyčnaha dośviedu.
Jak i Tramp, jaho ziać — bujny biznesmien. Svaju deviełapierskuju impieryju jon atrymaŭ u spadčynu ad baćki, Čarlza Kušniera.
Ličycca, što Donald Tramp prysłuchoŭvajecca da mierkavańnia svajho ziacia.
Padčas vybarčaj kampanii Trampa Kušnier kiravaŭ internet-stratehijami i zajmaŭsia pytańniami najmu vysokapastaŭlenych supracoŭnikaŭ. Paśla pryznačeńnia Kušniera svaim daradcam Tramp daručyŭ ziaciu zaniacca pieramovami ab vyrašeńni kanfliktu pamiž Izrailem i palestyncami. Jak kazaŭ Tramp, Kušnier, jaki vyras u artadaksalnaj habrejskaj siamji, dobra viedaje hety rehijon i ludziej.
