Majomaść 51-hadovaha rasijskaha biznesmena Vitala Arłova, uładalnika rybazdabyvalnaha chołdynhu «Noriebo», dasiahnuła $1 młrd, vynikaje z danych rejtynhu miljarderaŭ Bloomberg Billionaire Index. Pra heta piša RBK.
Fota «Kommiersant'»
Pavodle danych ahienctva, pavieličeńnie majomaści Arłova źviazana, u pryvatnaści, z antyrasijskimi sankcyjami: 60% jaho prodažaŭ, jak adznačaje vydańnie, źjaŭlajucca vynikam handlu za miežami Rasii, adnak «nazirajecca i rost ŭnutranaha spažyvańnia jak vynik abmiežavańnia impartu z-za sankcyj». Taksama na pavieličeńnie paŭpłyvaŭ rastučy rybny rynak, bo spažyŭcy imknucca «dadać zdarovy pratein ŭ svoj racyjon», i rost cany na trasku, jaki, pavodle danych narviežskaj rady pa pytańniach morapraduktaŭ, skłaŭ 13% z 2013 hoda.
«Noriebo» trapiła pad kantrol Arłova letaś, paviedamlaje ahienctva: adzin ź jaho partnioraŭ, Mahnus Rot, pradaŭ svaju dolu, a druhi, Alaksandr Tuhušaŭ, «byŭ abvinavačany za sprobu vymahalnictva» ŭ suviazi z kanfliktam, źviazanym ź jaho dolaj ŭ biznesie.
Pavodle źviestak Rasrybałoŭstva, ułoŭ ryby ŭ 2016 hodzie ŭ Rasii skłaŭ 4,75 młn t. Ź ich, piša Bloomberg, na chołdynh «Noriebo» prypadaje amal 11%. Dachody kampanii skłali $600 młn u 2015 hodzie, Arłoŭ raspavioŭ ahienctvu, a čysty doŭh — $450 młn, jaki ŭtvaryŭsia z-za ekspansii i kansalidacyi.
Jak adznačaŭ Arłoŭ u intervju «Kommiersantu», sankcyi akazalisia «stanoŭčym momantam» dla jaho biznesu. «Dziakujučy sankcyjam na rasijski rynak pierastała prychodzić kankurujučy z nami narviežski, isłandski sieladziec i skumbryja. Jašče mojva. My vielmi vialiki abjom sieladca i skumbryi pastavili na rasijski rynak. Heta pakazała, što cikavaść da rasijskaj ryby jość», — skazaŭ jon.
Pavodle jaho słoŭ, abjom ryby chołdynhu «Noriebo» na rasijskim rynku da ŭviadzieńnia abmiežavańniaŭ składaŭ ad 30 da 35%.
Vital Arłoŭ naradziŭsia ŭ 1965 hodzie ŭ Murmansku. U 1991 hodzie skončyŭ Murmanskoje vyšejšaje inžyniernaje marskoje vučylišča imia Leninskaha kamsamoła pa śpiecyjalnaści «sudnakiravańnie». Praz dva hady pačaŭ pracavać u murmanskam pradstaŭnictvie šviedskaj kampanii Scansea International, a z 1996 hoda — u narviežskim pradstaŭnictvie Scansea International. Atrymaŭ narviežskaje hramadzianstva, adnak u 2014 hodzie ad jaho admoviŭsia.
U 1997 hodzie razam z partnioram Mahnusam Rotam zasnavaŭ pradpryjemstva Ocean Trawlers. Da 2001 hodzie Ocean Trawlers staŭ najbujniejšym pradaŭcom traski ŭ Narviehii.
