Troje abvinavačanych znachodziacca pad vartaj sa studzienia 2016 hoda. Heta 39-hadovy Dźmitryj Sanikovič, 33-hadovy Artur Zinovič, i 30-hadovy Andrej Mazanik. Usie jany majuć za plačyma sudzimaści: Sanikovič — adnu, jakaja ŭžo pahašanaja, Mazanik — dźvie, a Zinovič — ažno siem.
Źleva naprava: Artur Zinovič, Dźmitryj Sanikovič, Andrej Mazanik
Čaćviorty fihurant spravy, 43-hadovy Jaŭhien Kozyr, na voli. Jon pravioŭ u SIZA tolki 6 miesiacaŭ. Kozyr siońnia nidzie nie pracuje, ale raniej u čynie staršaha lejtenanata ŭznačalvaŭ miascovy adździeł pa baraćbie z ekanamičnymi złačynstvami.
Dźmitryja Sanikoviča abvinavačvajuć u prymusie da vykanańnia abaviazacielstvaŭ, vykradańni čałavieka, vymahańni, machlarstvie, padbuchtorvańni da dačy chabaru; Andreja Mazanika — u prymusie da vykanańnia abaviazacielstvaŭ i vykradańni čałavieka; Artura Zinoviča — u prymusie da vykanańnia abaviazacielstvaŭ, vykradańni čałavieka i vymahalnictvie.
A eks-milicyjanta Kozyra vinavaciać u pieravyšeńni ŭłady abo słužbovych paŭnamoctvaŭ i złoŭžyvańni ŭładaj abo słužbovymi paŭnamoctvami. Taksama Sanikovič prachodzić pa hetych artykułach jak pamahaty.
Paciarpiełymi pa spravie prachodziać piaciora miascovych žycharoŭ. Ź ich vymahalniki «stryhli» hrošy. Ale narešcie, niekatoryja nie vytrymali i pajšli ŭ milicyju. Pryčym, sami paciarpiełyja śćviardžajuć: ad dziejańniaŭ abvinavačanych pakutavała šmat narodu, prosta inšyja spužalisia davać pakazańni.
Pa viersii śledstva padziei raźvivalisia nastupnym čynam. U 2013 hodzie Dźmitryj Sanikovič — jon da zatrymańnia aficyjna pracavaŭ układčykam-upakoŭščykam — prapanavaŭ znajomamu Uładzimiru Łudu supracu. Łud vałodaŭ budaŭničaj firmaj «MieKoStroj». Sanikovič prapanavaŭ pieraaformić firmu ŭ tavarystva z abmiežavanaj adkaznaściu. Płanavałasia, što jon układzie svaje hrošy, stanie adnym z zasnavalnikaŭ i budzie atrymlivać 50% prybytku. Łud pahadziŭsia, ale ŭžo praz try miesiacy Sanikovič vyrašyŭ vyjści ź biznesu i staŭ patrabavać partniora, kab toj viarnuŭ jamu hrošy.
Pryčym, pa słovach paciarpiełaha Łuda, Sanikovič ukłaŭ 8 tysiač dalaraŭ, a zabrać chacieŭ 22 tysiačy — nibyta 12 byli im układzieny, a 10 tysiač — ci to jaho zarobak, ci to pracenty.
Łud nie pahadziŭsia z takoj prapanovaj — 8 tysiač jon byŭ hatovy viarnuć, ale nie bolš. Pačalisia pahrozy. Łud śćviardžaje, što Sanikovič pahražaŭ jamu zabojstvam i ciažkimi cialesnymi paškodžańniami.
Praź niekalki miesiacaŭ, tak i nie atrymaŭšy hrošaj, Sanikovič damoviŭsia z Arturam Zinovičam i Andrejem Mazanikam, kab jany napałochali daŭžnika. Tyja zakinuli Łuda ŭ mikraaŭtobus, vyvieźli na mohiłki la vioscy Zarečča i prymusili kapać sabie mahiłu.
«Ty budzieš zaraz pachavany ŭ hetaj mahile, pobač z hetym nieviadomym čałaviekam», — pa słovach paciarpiełaha skazaŭ jamu Zinovič, pakazvajučy na śviežuju mahiłu niezdalok.
Uładzimir Łud paabiacaŭ, što addaść častku hrošaj. Jaho advieźli ŭ horad da Sanikoviča, jaki adpačyvaŭ u miascovym bary «Techas». Łud pazyčyŭ 3 tysiačy dalaraŭ u cieščy i addaŭ ich svajmu byłomu biznes-partnioru.
Ale Sanikovič praciahvaŭ patrabavać reštu i pahražać Łudu.
U śniežni taho ž hoda Jaŭhieni Kozyr, tady jašče načalnik ABEZ, razam z padnačalenym zatrymaŭ Łuda, advioz u miascovy RAUS. Pa słovach paciarpiełaha, jaho pałochali kryminalnaj spravaj i turemnym terminam, kali jon nie raźličycca z Sanikovičam. Apošni navat zabiraŭ u Łuda kluč ad elektronnaha podpisu, jaki patrebny, kab rasparadžacca hrašyma na rachunku firmy, i na niekalki dzion pieradavaŭ toj kluč na zachoŭvańnie Kozyru.
U śniežni Uładzimir Łud pieradaŭ Sanikoviču jašče 8 tysiač dalaraŭ, jakija jamu pazyčyŭ cieść. Pierad pieradačaj hrošaj sustrelisia z Kozyram.
«Cieść spytaŭ — kali 8 tysiač zaraz addamo, pieraśled spynicca? Kozyr paabiacaŭ, što tak», — raspavioŭ Łud.
Ale ž padčas pieradačy hrošaj Sanikovič prymusiŭ Łuda napisać raśpisku, što jon vinien jašče 10 tysiač dalaraŭ, zapeŭniŭ paciarpieły. Inakš Sanikovič pahražaŭ, što Kozyr raspačnie kryminalnuju spravu. Reštu hrošaj Łud abiacaŭ addać ciaham 2014 hoda. Ale znoŭ pačalisia pahrozy i za try etapy biznesoviec usio ž raźličyŭsia.
Akramia taho, Sanikovič pracavaŭ na AAT «Tratuar», z ułaśnikaŭ jakoha taksama «źniaŭ» hrošy. Padčas pravierki Dziaržstandartam, Sanikovič paviedamiŭ mužu i žoncy Bałašovym, jakija kiravali pradpryjemstvam, što ŭ jaho jość znajomyja siarod praviaralnikaŭ. Jon pierakanaŭ, što treba pieradać chabar, kab pravierka prajšła narmalna, i ŭziaŭ z uładaroŭ «Tratuaru» 2 tysiačy dalaraŭ, jakija pakłaŭ u svaju kišeniu. A paśla jany pieradali jamu jašče i smartfon, jaki nibyta pavinien byŭ być padziakaj žančynie, praź jakuju Sanikovič toj chabar nibyta pieradaŭ. Telefon taksama zastaŭsia ŭ Sanikoviča.
Znoŭ u 2014 Sanikoviču zapłaciŭ i jašče adzin biznesoviec, znajomy Uładzimira Łuda. Dźmitryj Tarasienka, ułaśnik budaŭničaj firmy «Beta-Biłd», zapłaciŭ 1,5 tysiačy dalaraŭ Sanikoviču.
«Jon patrabavaŭ hrošy, pahražaŭ nohi pierałamać. Ja jamu staŭ vinien, bo jon nibyta «padahnaŭ» mnie abjekt», - raspavioŭ Tarasienka.
Razam z tym 1,5 tysiačy Sanikovič stres i z Łuda. Toj kaža pryčyny faktyčna nie było, ale addaŭ, bo ŭsio jašče bajaŭsia:
«Heta byŭ mocny psichałahičny cisk uvieś čas. Strašna było nie toje, što źviarnucca kudyści, a prosta chadzić pa vulicy».
Ale ž u milicyju nichto tak i nie źviarnuŭsia.
U 2015 hodzie Dźmitryj Sanikovič vyrašyŭ padzarabić na jašče adnym miascovym biznesmienie - Stachiejevu. Ź jaho patrabavali hrošy, bo jon nibyta «adabraŭ abjekt» u ludziej Sanikoviča. Takim čynam biznesoviec raptam staŭ vinien Sanikoviču 70 miljonaŭ «starymi». Plus jašče 400 dalaraŭ, jakija Stachiejeŭ byŭ vinien inšym ludziam, dapamahaŭ vybivać ź jaho taksama Sanikovič.
U vyniku, nie dačakaŭšysia hrošaj, Sanikovič «pieradaŭ spravy» Arturu Zinoviču. Toj sustreŭ Stachiejeva i źbiŭ jaho bitaj.
«Ja Artura daŭno viedaju. Jon kali ćviarozy, to ź im choć u dziosny całujsia. A jak vypje, to moža zdarycca ŭsio, što zaŭhodna», - skazaŭ Stafiejeŭ.
Jon uzhadaŭ, jak praź niekalki miesiacaŭ paśla zdareńnia ź bitaj Zinovič napadpitku vypadkova sustreŭ jaho ŭ restaranie — i zvyčajnym stałovym nažom biez daj pryčyny prabiŭ jamu ruku.
Ale ž iznoŭ — u milicyju tak nichto i nie išoŭ. Sprava pačałasia tolki ŭ 2015 hodzie, kali Sanikovič viarnuŭsia da svajoj staroj achviary — Uładzimira Łuda.
«Jon uzhadaŭ tuju raśpisku, pra 10 tysiač dalaraŭ, pa jakoj ja daŭno raźličyŭsia, - raspavioŭ Łud. — Ale Sanikovič zajaviŭ, što hrošaj nie bačyŭ, i ja iznoŭ vinien jamu 10 tysiač».
I tolki tady Łud i Tarasienka pajšli pisać zajavu na Dźmitryja Sanikoviča.
Na sudzie nichto z abvinavačanych vinu nie pryznaŭ.
Sanikovič zajaviŭ, što ŭsio ahavor i ŭsio niapraŭda.
«A vy rabili toje, pra što kažuć?» — pacikaviŭsia sudździa Siarhiej Vasileŭski ŭ Jaŭhienija Kozyra.
«U miežach zakona, — adkazaŭ toj. — Uvohule, maju spravu sfalsifikavali supracoŭniki HUBAZ».
A Artur Zinovič spačatku zajaviŭ, što niekatoryja jaho dziejańni pavinny kvalifikavacca pa inšych artykułach («nie było tam anijakaj papiaredniaj zmovy!»), a paśla admoviŭsia pryznavać vinu.
Uvohule Zinovič spačatku rasčuliŭsia — kali svajaki pierad pasiadžeńniem pačali pytacca ci nie choładna jamu, na vočy mužčyny ledź nie naviarnulisia ślozy.
Ale dalej jon trymaŭsia badziora, navat humaryŭ. Naprykład, pačuŭšy ad žurnalistaŭ biełaruskuju movu, zajaviŭ: «Žyvie Biełaruś! Nu a što, śpiavać dyk śpiavać. Pa dziasiatcy navalać dy i ŭsio».
A paśla kryknuŭ: «Presa, vy za kaho? Budźcie za nas!»
