Kampanija Yahoo, jakaja naprykancy vieraśnia paviedamlała pra kradziež chakierami 500 miljonaŭ akaŭntaŭ svaich karystalnikaŭ u 2014 hodzie, paviedamiła pra jašče adnu ataku.
Amierykanski internet-hihant śćviardžaje, što ataka adbyłasia jašče ŭ žniŭni 2013 hoda, i ŭ jaje vyniku chakiery skrali bolš za miljard akaŭntaŭ. Heta robić jaje samaj bujnoj kibier-praboinaj za ŭsiu historyju.
U Yahoo adznačyli, što ataki 2013 i 2014 hadoŭ, chutčej za ŭsio, nie źviazanyja pamiž saboj.
Yahoo prosić svaich klijentaŭ źmianić usie paroli. Heta bolš surjoznaja miera, čym taja, jakuju rekamiendavali paśla abnarodavańnia minułaj uciečki — tady było dastatkova tolki źmianić parol Yahoo.
Vidavočna, što heta byŭ bolš surjozny kradziež. Chakiery atrymali dostup da imionaŭ, adrasoŭ elektronnaj pošty, dat naradžeńnia i navat sakretnych pytańniaŭ i adkazaŭ na ich.
Ekśpierty ŭ pytańniach biaśpieki śćviardžajuć, što chakierskija ataki stali vynikam niadbajnaści kiraŭnictva Yahoo, jakoje pahrebavała mierami biaśpieki paśla pieršych surjoznych atak jašče ŭ 2012 hodzie.
Brus Šnajer, adzin z samych aŭtarytetnych ekśpiertaŭ u halinie biaśpieki, adznačyŭ, što Yahoo «nie adniesłasia da biaśpieki surjozna». «Ja b u dalejšym mieŭ prablemy z davieram da Yahoo»— dadaŭ jon.
Hałoŭny strateh pa pytańniach biaśpieki CarbonBlack Ben Džonsan adznačyŭ: «Kali jakaja-niebudź kampanija dvojčy kampramietujecca — heta kaža ab jaje ŭraźlivaści albo ŭzroŭni karparatyŭnaj kultury, a nie ab daśviedčanaści zładziejaŭ».
Cikava, što pradstaŭnikoŭ Yahoo nie zaprasili na sustreču lidaraŭ IT-śfiery z abranym prezidentam ZŠA Donaldam Trampam, jakaja adbyłasia ŭ hety ž dzień, kali stała viadoma pra prablemu z akaŭntami.
