Sierbskija ŚMI apublikavali fota, na jakim u liku inšych ludziej jość kiraŭnik MZS Rasii Siarhiej Łaŭroŭ i Niemańja Ryścič — adzin ź mierkavanych udzielnikaŭ sproby dziaržaŭnaha pieravarotu ŭ Čarnahoryi.
Ryścič na fota krajni źleva, pobač ź im — Milica Džurdževič (z šalikam na šyi), AP
Fatahrafija zroblena 12 śniežnia kali Łaŭroŭ padčas vizitu ŭ Sierbiju naviedvaŭ miemaryjał, uźviedzieny ŭ pamiać pra voinaŭ-vyzvalicielaŭ Biełhrada.
Na fota pobač z Łaŭrovym stajać pradstaŭniki pravaha ruchu «Zavietniki», u tym liku jaho pres-sakratar Milica Džurdževič. Ich taksama možna ŭbačyć na videazapisie, vykładzienym na YouTube.
Ryścič śćviardžaje, što trapiŭ na fota vypadkova.
«Zavietniki» — sierbskaja moładzievaja patryjatyčnaja arhanizacyja, jakaja ličyć svaim pryjarytetam baraćbu z NATA.
Kiraŭnik ruchu Stefan Stamiankoŭski ŭ kastryčniku 2016 hoda naviedvaŭ Maskvu, dzie sustrakaŭsia z deputatam Dziarždumy Siarhiejem Žaleźniakom.
Milica Džurdževič u lutym 2016 hoda ŭdzielničała ŭ arhanizacyi antynataŭskaha šeścia razam z eks-kiraŭnikom sierbskaj žandarmieryi Bracisłavam Dzikičam.
Dzikič razam z Ryścičam uvachodziać u pieralik mierkavanych arhanizataraŭ sproby pieravarotu ŭ Čarnahoryi.
U siaredzinie kastryčnika palicyja Čarnahoryi zatrymała kala 20 sierbaŭ, jakich paśla abvinavacili ŭ padrychtoŭcy zamachu na premjer-ministra krainy i sprobie dziaržaŭnaha pieravarotu.
Jak paviedamlała prakuratura Čarnahoryi, u zmovie taksama ŭdzielničali dvoje rasijanaŭ: Eduard Šyrokaŭ i Uładzimir Papoŭ. ŚMI pisali, što jany źjaŭlajucca supracoŭnikami rasiejskich specsłužbaŭ. Infarmacyi pra hetych ludziej u adkrytym dostupie niama.
Čytajcie taksama: