Novym ministram adukacyi niečakana staŭ lidar Kamunistyčnaj partyi Biełarusi Ihar Karpienka, jaki da niadaŭniaha času pracavaŭ namieśnikam pa ideałohii staršyni Minharvykankama. «Strašna za dziaciej» — samy załajkany kamientar na tut.by z hetaj nahody.
«Naša Niva» aktualizavała piać faktaŭ pra novaha ministra.
Uźniaŭsia na vychavaŭčaj pracy ŭ Pieduniviery
Ihar Karpienka naradziŭsia ŭ 1964 u Novakuźniecku. Heta sibirski horad niepadaloku ad Kazachstana i Manholii.
Paśla škoły Karpienka adsłužyŭ u vojsku (1982—1984), i tolki tady apynuŭsia ŭ Minsku.
Budučy ministr skončyŭ Pieduniviersitet pa śpiecyjalnaści «Historyja i zamiežnaja mova», u vyniku ŭ hetaj navučalnaj ustanovie i zastaŭsia.
Z 1989 da 2001 hoda byŭ sakratarom kamiteta kamsamoła, načalnikam adździeła vychavaŭčaj pracy ŭ BDPU, paśla na paru hadoŭ staŭ načalnikam upraŭleńnia vychavaŭčaj pracy i jašče na hod — prarektaram pa vychavaŭčaj pracy.
Historyk Ihar Mielnikaŭ, jaki vučyŭsia ŭ Pieduniviersitecie, uzhadvaje, što ŭ tyja časy Karpienka nie prajaŭlaŭ nijakaj antybiełaruskaści, nie prapahandavaŭ kamunistyčnych ideałaŭ ci prarasijskich pohladaŭ. Jon uznačaliŭ stvorany pry BDPU paśpiachovy navučalny centr «Sučasny śviet», jaki prapanoŭvaŭ dadatkovuju płatnuju adukacyju pa zamiežnych movach, a taksama kampjutarnyja kursy.
Karpienka vykładaŭ «Kulturu maŭleńnia» i vyhladaŭ našmat bolš sučasnym i jeŭrapiejskim vykładčykam, čym jaho zamšełyja kalehi.
Usia karjera na płoščy Niezaležnaści
U 2004 hodzie Karpienka abiraŭsia ŭ parłamient. Jon bałatavaŭsia pa Jasieninskaj akruzie jak biespartyjny i, pavodle aficyjnaj infarmacyi, nabraŭ 52%. Trom jahonym kankurentam-apazicyjanieram zapisali pa 13—14% kožnamu.
U parłamiencie treciaha sklikańnia Karpienka ŭvajšoŭ u kamisiju pa achovie zdaroŭja, fizkultury, spravach siamji i moładzi.
Na nastupnych vybarach Karpienka ŭžo pradstaŭlaŭ Kamunistyčnuju partyju. Aficyjnyja vyniki dali jamu 66,5%, a jahonaj supiernicy Valancinie Śviackaj ad BNF (jana supraćstajała Karpienku druhi raz zapar) — 20%. U hetym sklikańni novaśpiečany kamunist zaniaŭsia mižnarodnymi spravami i suviaziami z SND. Naprykancy terminu jon uznačaliŭ adpaviednuju kamisiju.
«Vobrazna kažučy, ja ŭžo nie školnik, kab mnie z PARIE pahražali palcam, što my niešta nie tak robim, — zajaŭlaŭ jon padčas vizitu ŭ Francyju. — U nas stvorana pracoŭnaja hrupa, jakaja vyvučaje pytańnie ŭviadzieńnia maratoryju na śmiarotnaje pakarańnie. Rezalucyja PARIE tolki nanosić škodu vyrašeńniu hetaha pytańnia. U nas jość peŭnaja hramadzianskaja i čałaviečaja hodnaść, jakaja nie dazvalaje tryvać nastaŭleńnie z boku».
Pieduniviersitet znachodzicca na płoščy Niezaležnaści ŭ Minsku. U susiednim budynku pracujuć urad i parłamient, praz darohu znachodzicca Minharvykankam. Za 30 hadoŭ žyćcia ŭ Biełarusi Karpienka ni razu nie pracavaŭ nidzie, aproč płoščy Niezaležnaści!
Z vybarčaj kamisii ŭ hałoŭnyja ideołahi Minska
Karpienka padčas uznaharodžvańnia skandalnaj «Mis-Minsk — 2013»
Padčas prezidenckaj kampanii-2010 Karpienka, jaki adkryta zaklikaŭ svaju partyju padtrymać Łukašenku, uznačaliŭ Minskuju vybarčuju kamisiju.
Jon asabista prychodziŭ na sustrečy apazicyjnych kandydataŭ z vybarcami i papiaredžvaŭ pra niezakonnaść takich akcyj.
U vyniku Minskaja vybarčaja kamisija zafiksavała, što ŭ stalicy za Łukašenku prahałasavała bolš za 67% čałaviek. Misija Karpienki była paśpiachova vykananaja.
Na nastupny hod kamunist staŭ namieśnikam staršyni Minharvykankama. U śfieru jahonaha ŭpłyvu ŭvajšli pytańni ideałohii, adukacyi, achovy zdaroŭja, sportu, turyzmu i sacyjalnaj abarony.
Marnaja baraćba z łacinkaj
Čym zapomniŭsia Karpienka na pasadzie hałoŭnaha ideołaha stalicy, dyk heta baraćboj ź biełaruskaj łacinkaj u mietro. Čynoŭnik patrabavaŭ spynić tranślitaracyju hieahrafičnych nazvaŭ, u tym liku, naprykład, stancyj mietro, ź biełaruskaj movy. Adnak ekśpierty zaŭparcilisia i prymusili Karpienku adstupić, prynamsi časova.
Inšaja jaho inicyjatyva — prapanova ŭvieści adkaznaść za falsifikacyju historyi Druhoj suśvietnaj vajny. «Mahčyma, nadyšła nieabchodnaść na zakanadaŭčym uzroŭni zamacavać peŭnuju adkaznaść za falsifikacyju historyi Druhoj suśvietnaj i Vialikaj Ajčynnaj vajny, pastavić zasłon niedarečnym vykazvańniam chacia b u pamiać pra zahinułych i z pavahi da vieteranaŭ», — tłumačyŭ jon.
«My chočam siońnia syści ad pierajmienavańnia vulic, hety pieryjad my prajšli ŭ pačatku 1990-ch», — raskazvaŭ jon. Na pytańnie, čamu ŭ stalicy niama vulicy Vasila Bykava, Karpienka adkazvaŭ, što ŭšanavańnie pamiaci nie abaviazkova pavinna adbyvacca praz nazvy vulic: «Ja b nie dramatyzavaŭ hetuju situacyju». Zatoje vulica Karła Marksa, na jaho dumku, patrebnaja, bo jahonyja pracy vyvučajucca ŭ mnohich univiersitetach śvietu. Achoŭvaje jon i skulptury Lenina: «Pomniki znosiacca dla nastupnaj falsifikacyi historyi śpiecyjalna». Bolš za toje, na vačach minčukoŭ źjaŭlalisia navat novyja leniny. Zhadajma skandał na 7 listapada, kali pomnik vystavili na płoščy pierad prachadnoj MTZ.
Hałoŭny kamunist Biełarusi
U biełaruskich čynoŭnikaŭ nie pryniata znachodzicca ŭ šerahach palityčnych partyj. A Karpienka nie prosta partyjec, a jašče i sakratar (kiraŭnik) prałukašenkaŭskaj Kamunistyčnaj partyi Biełarusi. Arhanizacyju jon uznačaliŭ u 2012 hodzie.
«Niesumnienna, u asnovie našaj prahramy lažyć teoryja marksizmu-leninizmu… Heta partyja, jakaja siońnia prapahanduje idei hramadstva sacyjalnaj spraviadlivaści, na moj pohlad, my pavinny zaniać levy fłanh palityčnaj dziejnaści ŭ nas u Biełarusi», — zajaviŭ jon paśla abrańnia.
Sioleta Karpienka lataŭ ź siabroŭskim vizitam u… Siryju. Hałoŭny kamunist Biełarusi sustreŭsia z Bašaram Asadam i padaryŭ jamu karcinu «Dzień pieramohi».
Supadzieńnie ci nie, ale mnohija staličnyja škoły apošnim časam stali vypisvać partyjnuju hazietu «Kamunist Biełarusi». Rabotniki adukacyi tłumačać, što nibyta robiać heta z ułasnaj inicyjatyvy.
«Pośpiech padpisnoj kampanii zaklučajecca ŭ ciesnym uzajemadziejańni Minharvykankama, rajonnych administracyj dy ideałahičnaha aktyvu z drukavanymi vydańniami, hramadskaściu, pracoŭnymi kalektyvami», — raskazvaŭ Karpienka pra raspaŭsiud dziaržaŭnych ŚMI.
* * *
Cytaty Ihara Karpienki
- Kali kazać pra rejtynh palitykaŭ XX stahodździa, to, biezumoŭna, pieršaje miesca zajmaje Uładzimir Lenin … Kraina, u jakoj pałova nasielnictva nie ŭmieła čytać i pisać, u ličanyja hady pieratvaryłasia ŭ samuju čytajučuju krainu … Mienavita dziakujučy leninskaj nacyjanalnaj palitycy źjavilisia takija nacyjanalnyja dziaržavy jak Ukraina, Biełarusija (mienavita tak — «NN»), Finlandyja i inšyja.
- Budučynia za sacyjalistyčnaj madellu. Heta paćviardžaje i sacyjalistyčny vybar Kitaja, Vjetnama, Kuby i šerahu inšych krain Łacinskaj Amieryki.
- Pad sajuz Rasii i Biełarusi zakładziena libieralnaja mina.
- Jelcynska-pucinskaja Rasija — heta dziaržava restaŭracyi kapitalizmu.
