U siaredzinie studzienia 2017 hoda płanujucca aficyjnyja vizity kiraŭnika Biełarusi ŭ Jehipiet i Sudan. Heta vynikaje ź lista Biełaruskaj handlova-pramysłovaj pałaty (BiełHPP) na imia kiraŭnikoŭ biełaruskich pradpryjemstvaŭ, jakoje raspaŭsiudžvałasia 15 śniežnia na pasiadžeńni biełaruska-emirackaha dziełavoha savieta.
U im, u pryvatnaści, paviedamlajecca, što aficyjny vizit Alaksandra Łukašenki ŭ Jehipiet płanujecca z 15 pa 17 studzienia, u Sudan — z 17 pa 19 studzienia. U skład biełaruskaj delehacyi taksama buduć uklučanyja pradstaŭniki dziełavych kołaŭ. Meta vizitaŭ — udzieł u jehipiecka-biełaruskim (u Kairy) i sudanska-biełaruskim (u Chartumie) biznes-forumach i dziełavych pieramovach ź jehipieckimi i sudanskimi biznesmienami na pradmiet supracoŭnictva.
Pavodle infarmacyi BiełHPP, pierśpiektyŭnymi śfierami dziejnaści dla raźvićcia supracoŭnictva i ekspartu biełaruskaj pradukcyi i pasłuh u Jehipiet i Sudan źjaŭlajucca mašynabudavańnie, stankabudavańnie, naftachimija, mietałaapracoŭka, drevaapracoŭka, lohkaja pramysłovaść, farmaceŭtyka, miedycyna, hieołaharaźviedka i inšyja napramki.
Pavodle infarmacyi BiełHPP, z 16 pa 18 studzienia taksama adbudziecca aficyjny vizit pieršaha vice-premjera Biełarusi Vasila Maciušeŭskaha ŭ Hankonh (Kitaj). U ramkach vizitu płanujucca sustrečy z kiraŭnictvam Kitajskaha kamiteta sadziejničańnia mižnarodnym handli, kanfiederacyi handlova-pramysłovych pałat krain Azijacka-Cichaakijanskaha rehijonu, pieramovy ź dziełavymi kołami Hankonha, naviedvańnie viadučych pradpryjemstvaŭ śpiecyjalnaha administracyjnaha rajona Hankonh.
