Kiraŭnik dziaržavy Alaksandr Łukašenka patrabuje zabiaśpiečyć vykanańnie nacyjanalnych intaresaŭ Biełarusi pry pryniaćci Mytnaha kodeksa Jeŭrazijskaha ekanamičnaha sajuza. Pra heta jon zajaviŭ siońnia na naradzie pa prajekcie damovy ab Mytnym kodeksie JEAES, paviedamlaje BiełTA.
Alaksandr Łukašenka adznačyŭ, što Biełaruś źjaŭlajecca ekspartaaryjentavanaj krainaj, ale ŭ toj ža čas šmat što impartujecca. «Mytny kodeks — jakraz toj dakumient, jaki pierš za ŭsio rehuluje hetyja adnosiny. My zaŭsiody kažam, što ekspart dla nas žyćciova važny. Jon prynosić u krainu valutu i zabiaśpiečvaje žyćcio našych ludziej», — skazaŭ kiraŭnik dziaržavy.
«Tamu hety dakumient pavinien być absalutna vyvieranym. I paśla jaho ŭstupleńnia ŭ siłu nivodny hramadzianin Biełarusi, i ja ŭ tym liku, nie pavinny zadać pytańnie ŭradu, jaki pierš za ŭsio vypracoŭvaŭ i ŭzhadniaŭ hety dakumient, što ž my majem na samaj spravie i čamu dzieści stała horš, čym było, — padkreśliŭ biełaruski lidar. — Jakim by Mytny kodeks ni byŭ kampramisnym (nie vyklučaju, što dzieści mahčymyja kampramisy), ale paharšać tuju sacyjalna-ekanamičnuju situacyju, jakaja isnuje ŭ Biełarusi, nam ni ŭ jakim razie nielha».
«Usio pavinna być pradumana, vyvierana ŭ ministerstvach, viedamstvach, abłvykankamach. Kali treba, u har-, rajvykankamach. Treba pryciahnuć usich śpiecyjalistaŭ, až da apazicyjna dumajučych, jak my ich časta nazyvajem. Davieści da ich hetyja pałažeńni, da hramadzian našaj krainy nieadkładna, kab jany mahli adreahavać i skazać, što nam vyhadna, a što nie», — daručyŭ Łukašenka.
Jon padkreśliŭ, što razhladany dakumient źjaŭlajecca vielmi surjoznym dla krainy. «Ja źviartaju takuju ŭvahu na novy Mytny kodeks, tamu što ŭ nas byli pytańni da toj sistemy, jakaja siońnia isnuje pa starym Mytnym kodeksie. I ja nie adnojčy ciapierašniamu premjer-ministru zadavaŭ pytańni, pakolki jon u nas byŭ kiraŭnikom pieramoŭnaj hrupy ad Biełarusi. Tamu ŭsio pavinna być uličana», — dadaŭ Alaksandr Łukašenka.
Adpaviedny dakumient, pavodle słoŭ kiraŭnika krainy, płanujecca padpisać na pasiadžeńni Vyšejšaha Jeŭrazijskaha ekanamičnaha savieta 26 śniežnia ŭ Sankt-Pieciarburhu. Alaksandr Łukašenka adznačyŭ, što da pryniaćcia im rašeńnia ad Biełarusi chacieŭ by pačuć mierkavańni adkaznych słužbovych asobaŭ i asabliva tych, chto pastavić svoj podpis u jakaści vizy pad prajektam dahavora. «A heta ŭsio členy ŭrada i vyšejšyja słužbovyja asoby», — udakładniŭ jon.
