Mikałaj Pietramovič pracavaŭ namieśnikam kiraŭnika administracyi Partyzanskaha rajona, adkazvaŭ za ideałohiju. A jašče byŭ deputatam Minharsavieta, pryčym nie aby-jakim — partyjnym, ad praŭładnych kamunistaŭ.
Ale prykładna ź miesiac tamu Pietramovič źnik adusiul. Na sajcie administracyi Partyzanskaha rajona infarmacyju pra jaho ŭžo prybrali.
Kažuć, što čynoŭnik-deputat nabraŭ hrošaj i źbieh z krainy.
«My jaho šukajem, bo jon vinien nam hrošy. Sumu ahučvać nie chaču. Dzie jon — nieviadoma, navat jaho žonka jaho nie viedaje. Jon nie ŭ Biełarusi, dumaju», — kaža Taćciana Jakušava ź Viciebska.
Žančyna šukaje Pietramoviča praz sacyjalnyja sietki. Ale ž ani jana, ani jaje muž pra padrabiaznaści svaich znosin z kamunistam-deputatam havaryć nie chočuć.
«Ja tolki skažu, što na jaho ŭžo napisali zajavu ŭ Minsku — i paciarpiełych tam nie adzin i nie dva čałavieki. Jon taksama im vinien hrošy», — paviedamiŭ Vasil, muž Taćciany.
U administracyi Partyzanskaha rajona paviedamili, što z 24 kastryčnika Pietramovič u ich bolš nie pracuje. Čamu raptam jon pakinuŭ pasadu, tłumačyć admovilisia.
«Heta infarmacyja nie dla presy», — paviedamili ŭ administracyi rajona.
U Kamunistyčnaj partyi Biełarusi, ad jakoj bałatavaŭsia Pietramovič, śćviardžajuć, što nie viedajuć, što ź siabram partyi. Zapeŭnivajuć, nie majuć anijakich kantaktaŭ svajho adnapartyjca.
Milicyja ŭžo zacikaviłasia hetaj historyjaj. U pres-słužbie HUUS Minharvykankama paviedamili, što ŭ dačynieńni da Pietramoviča pravodzicca pravierka.
Mikałaj Pietramovič naradziŭsia ŭ 1978 hodzie ŭ vioscy Žyrovičy Słonimskaha rajona Hrodzienskaj vobłaści. Vučyŭsia na śledča-ekśpiertnym fakultecie Akademii MUS Biełarusi, u Maskoŭskim novym jurydyčnym instytucie. Skončyŭ Instytut dziaržaŭnaj słužby Akademii kiravańnia.
Raniej Pietramovič pracavaŭ načalnikam upraŭleńnia kadraŭ na minskim «Intehrale», uznačalvaŭ tam arhanizacyju BRSM.
Kali bałatavaŭsia ŭ miascovyja deputaty, ukazvaŭ u dekłaracyi siaredni zarobak za 2013 hod. Jak mieniedžar «Intehrała» jon atrymlivaŭ štomiesiac amal $1300.
