Michaił Saakašvili, jaki niekalki dzion tamu padaŭ u adstaŭku z pasady hubiernatara Adeskaj vobłaści Ukrainy, zajaviŭ ab stvareńni novaj palityčnaj siły ŭ krainie, piša VVS.
Getty
Pavodle jaho słoŭ, asnoŭnaja meta novaha ruchu ciapier — heta praviadzieńnie daterminovych parłamienckich vybaraŭ va Ukrainie. A zatym prychilniki Saakašvili płanujuć zaniacca praviadzieńniem reformaŭ va Ukrainie.
«My budziem stvarać novuju šyrokuju palityčnuju siłu, takuju płatformu novych sił, i metaj našaj źjaŭlajecca źmiena ciapierašniaj tak zvanaj palityčnaj elity, a na samaj spravie baryh i adkidaŭ hramadstva, jakija kantralujuć Radu, kabiniet ministraŭ i ŭsio ŭ hetaj uładzie Ukrainy», — skazaŭ Saakašvili.
Padčas pres-kanfierencyi na ekranie źjaviłasia nazva «Płatforma novych sił» z adrasam elektronnaj pošty.
«U nas buduć ludzi, jakija — jašče raz paŭtaru — bolš za adzin poŭny termin nie byli ŭ Radzie, nie zaŭvažanyja ŭ drennych rečach i nie znachodzilisia doŭha na vysokaj pasadzie ŭ vykanaŭčaj uładzie. Ničoha asabistaha. Navat kali dobryja ludzi traplali na inšy bok, jany u nas nie buduć», — zajaviŭ Saakašvili.
Palityk taksama abiacaŭ, što novaja palityčnaja siła, jakuju jon płanuje stvaryć, nie budzie ŭstupać u błoki ź inšymi partyjami.
Jon taksama zajaviŭ, što nie budzie supracoŭničać z prezidentam krainy Piatrom Parašenkam, u jakoha ŭžo «byŭ šaniec vykarystać» Saakašvili ŭ «pravilnych metach».
Saakašvili padaŭ u adstaŭku z pasady kiraŭnika Adeskaj vobłaści 7 listapada. Asnoŭnaj pryčynaj adstaŭki jon nazvaŭ niezadavolenaść palitykaj Kijeva. Jon abvinavaciŭ Parašenku ŭ «asabistaj padtrymcy karupcyjnych kłanaŭ» Adeskaj vobłaści. 10 listapada Parašenka padpisaŭ ukaz ab zvalnieńni Saakašvili.
Były prezident Hruzii Michaił Saakašvili uznačalvaŭ Adeskuju vobłaść z maja 2015 hoda. Dla atrymańnia hetaj pasady jamu daviałosia pryniać ukrainskaje hramadzianstva.