Kirył Šviec.
Amierykanski iluzijanist Hary Hudzini (Harry Houdini) pakazaŭ «Kitajskuju kamieru katavańniaŭ» u 1912-m hodzie. Da siońnia heta adzin z samych šakujučych trukaŭ u śviecie. Raniej biełarusy mahli jaho bačyć zbolšaha ŭ kino — fokus prysutničaje, naprykład, u filmach «Prestyž» abo «Iluzija padmanu». Šaniec pahladzieć jaho žyŭcom vypaŭ u subotu haradziencam.
Stym-pankavy śpiektakl ad fryk-teatru «Hieksahien».
Paŭtarahadzinnaje šou «Houdini» pastavili ŭ abłasnym dramatyčnym teatry; hledačoŭ ździŭlali fokusami z hałubami, kartami dy ahniom prezident Mižnarodnaj asacyjacyi mahaŭ Uład Kryvanohaŭ dy Jana Škalarenka, pryzior fiestyvalu iluzijanistaŭ u Banhkoku.
Śmiarotna niebiaśpiečny fokus słavutaha Hary Hudzini — vyzvaleńnie sa šklanoj skryni, napoŭnienaj vadoj — stała razynkaj stym-pankavaha teatralnaha pierformansu, jaki supravadžaŭ šou iluzijaŭ. Vykanaŭ jaho małady haradzienski iluzijanist — Kirył Šviec. «Kiepskija chłopcy» nakinuli 22-hadovamu mahu kajdanki na ruki, mietalovy abruč — na tułava, a nohi źviazali łancuhami, začyniŭšy na vosiem zamkoŭ.
Truk stohadovaj daŭniny ździŭlaje da siońnia.
Zatym iluzijanista apuścili ŭniz hałavoj u reziervuar z vadoj dy schavali «vodnuju turmu» pad nakidkaj. Praz paru chvilin, kali nakidka była apuščana, iluzijanista tam užo nie było. Źvierchu na šklanoj skryni siadzieła dziaŭčyna.