Lidar maładafrontaŭcaŭ byŭ 8 vieraśnia zatrymany na pracy. U hety samy dzień la rasijskaha pasolstva musiła adbycca akcyja da hadaviny Aršanskaj bitvy. Praz 3,5 hadziny Daškieviča adpuścili ź milicyi.
Źmicier Daškievič i Volha Nikałajčyk. Fota Alaksieja Šeina
«Naša Niva»: Što ŭvohule adbyłosia?
Źmicier Daškievič: Ja niedzie ŭ 16:30 vyjšaŭ z pracy ŭ padvał za tronkami — heta ŭ susiednim padjeździe. Źviarnuŭ uvahu, što pobač siadzić niejki hebist. Jašče paškadavaŭ, što nie ŭziaŭ z saboj telefon.
Hety čałaviek kinuŭsia da mianie, tycnuŭ u tvar «korkaj». Kaža, pajechali dla tłumačeńniaŭ u RUUS. Ja kažu, pasłuchajcie, u mianie žonka, dvoje dziaciej, mnie ich treba papiaredzić. A to tut možna na try hadziny źjechać, a možna i na try hady.
Nie, nie pałožana, adkazvaje jon. Ach tak! Ja tady prosta tak nie damsia. Pačaŭ kryčeć na ŭvieś dvor: «Dapamažycie!» Ich tady nalacieła čałaviek dziesiać, pavałakli. Usio heta susiedzi bačyli, čuli.
«NN»: Nie bili?
ZD: Trochu miali, kaniečnie, ale pa-našamu heta nie bili. Ruki trochu załamali, panieśli. Trochu brutalna, kaniečnie, ale biez asablivaha hvałtu. Byvała, što ŭ aŭtazakach małacili, dyk tut nie, kinuli ŭ mašynu i ŭsio.
U RUUSie skazali, što treba dać tłumačeńni. Kažu, ništo sabie vy na razmovu zaprašajecie. Dajcie tłumačeńnie, što vy rabili ŭ Vietcy. Pasłuchajcie, pa-biełarusku tut nichto nie razmaŭlaje, ja nie daju tłumačeńniaŭ.
Znajšli mnie padpałkoŭnika, jaki na cudoŭnaj biełaruskaj movie ŭziaŭ u mianie tłumačeńni. Hutaryli jašče pra Krym, Pucina. Kivajuć hryvami, ale ahresiŭna svaje pohlady nie vyjaŭlajuć. Ź niečym navat pahadžajucca.
Paśla hadzinu-paŭtara siadzieŭ i čakaŭ, kali pastupić zahad vyzvalać. U rajadździeł pryjazdžaŭ Sieviaryniec, Nasta [žonka Źmitra — «NN»], im kazali, što mianie tut niama. Ciapier u Centralnym taksama admaŭlajuć, što jość zatrymanyja. A tut Volha Nikałajčyk vyjšła z Centralnaha, Uładź Jaromienak, Siarhieja Palčeŭskaha nie možam znajści.
«NN»: Čamu siońnia adbylisia zatrymańni, ich ža daŭno nie było?
ZD: Ja heta źviazvaju ŭ adzin łancuh z padziejami ŭ Vietcy, z rasijskim ściaham na Paralimpijskich hulniach. Absalutna vidavočna, što takaja začystka — heta adzin prahib pierad Maskvoj, kab dali kredyt. Pałochajuć Maskvu, što inakš daduć patryjotam zialonaje śviatło, dyk nie abiareciesia prablem.
Mahčyma, heta ŭžo pieršyja łastaŭki razvarotu Biełarusi ad libieralizacyi. U nas ža historyja apošnich hadoŭ śpiralnaja, to ŭ libieralizacyju hulajemsia, to zaciskajucca hajki z bałtami.
