Staršynia Centrvybarkama Lidzija Jarmošyna raić z razumieńniem pastavicca da zaklikaŭ pryjści na ŭčastki dla hałasavańnia, bo vybary — «heta važnaja dziaržaŭnaja sprava». Pra heta jana zajaviła ŭ videazvarocie, raźmieščanym 8 vieraśnia na sajcie vybory2016.by.
Jarmošyna patłumačyła, što vybary buduć ličycca sapraŭdnymi, kali na ich prahałasuje bolš za 50% vybarščykaŭ. «Tamu tak važnaja jaŭka vybarščykaŭ, tamu idzie takaja baraćba za ŭdzieł vybarščykaŭ u vybarach», — patłumačyła jana.
Pa słovach staršyni CVK, sprava nie ŭ dosyć vysokim košcie vybaraŭ (kala 10 młn dalaraŭ), a ŭ tym, što «abrańnie parłamienta, ščasnaje zaviaršeńnie najvažniejšaj palityčnaj kampanii — heta pierš za ŭsio asnova palityčnaj stabilnaści našaj dziaržavy», heta abrańnie zakanadaŭčaha orhana, jaki budzie supracoŭničać z parłamientami inšych dziaržaŭ, «abaraniajučy našy intaresy».
«Davajcie zrobim usio, kab vybary adbylisia, z razumieńniem pastavimsia da zaklikaŭ administracyj VNU, pradpryjemstvaŭ, arhanizacyj, ŽESaŭ, kab vy paŭdzielničali ŭ vybarach. Pa-mojmu, praściej zadavolić hetyja pažadańni i sapraŭdy pryjści na vybarčyja ŭčastki. Kali vas nie zadavalniajuć kandydaty, jakija bałatujucca pa dadzienaj akruzie, dla vas, niezdavolenych, isnuje hrafa suprać usich. Choć, ja dumaju, u nas hodny padbor kandydataŭ, jakija pradstaŭlajuć usie punkty hledžańnia», — skazała kiraŭnik CVK.
«Aktyŭnyja zakliki» administracyj VNU i arhanizacyj uziać udzieł u vybarach, pa jaje słovach, nie źjaŭlajucca parušeńniami zakanadaŭstva. «Vy možacie nie adhuknucca na ich i nie pryjści na vybary. Ci pryjści 11 vieraśnia. Tym nie mienš dadzienyja zaprašeńni majuć miesca być i nie źjaŭlajucca parušeńniami zakona», — skazała jana.
Jarmošyna paviedamiła pra pastupajučyja skarhi na zakliki administracyj arhanizacyj, jakija ahitujuć prahałasavać za taho ci inšaha kandydata. «Heta taksama nie źjaŭlajecca parušeńniem zakona. Ahitacyja dazvolenaja», — padkreśliła jana, adznačyŭšy, što parušeńniem budzie ličycca tolki rasparadžeńnie kiraŭnictva svaim padnačalenym pravodzić takuju ahitacyju ŭ pracoŭny čas.
Centrvybarkam, pavodle słoŭ Jarmošynaj, taksama prykładzie namahańni, kab vybarščyki pryjšli na vybarčyja ŭčastki. U pryvatnaści, pa jaje słovach, CVK źviarnuŭsia ŭ Ministerstva suviazi i infarmatyzacyi z prośbaj praz apierataraŭ mabilnaj sietki nakiravać usim vybarščykam zaprašeńnie pryjści na vybarčyja ŭčastki. «Heta nie źjaŭlajecca parušeńniem zakona, heta — infarmavańnie hramadzian», — ličyć jana. Pry hetym, pavodle jaje słoŭ, zaprašeńni budzie rassyłać aŭtamat, a tamu ich mohuć atrymać zamiežniki, zamiežnyja naziralniki, niepaŭnaletnija, jakija nie majuć prava hołasu.
