20-hadovaha hrodzienca Maksima Jahnieška abvinavačvali adrazu pa troch artykułach: pahroza zabojstvam, adkryty kradziež majomaści, spałučany z hvałtam, nie niebiaśpiečnym dla žyćcia i zdaroŭja paciarpiełaha, a taksama złosnaje chulihanstva.
Maksim Jahnieška — sprava.
Sud Leninskaha rajona h. Hrodna razhladaŭ hetuju spravu ŭ zakrytym režymie pa prośbie adnaho z paciarpiełych. Chłopiec vykazaŭ zaniepakojenaść, što jaho žyćciu moža chto-niebudź ci što-niebudź pahražać. Sudździa pahadziŭsia, tamu pasiadžeńni amal 1,5 miesiaca prachodzili biez starońnich.
Historyja pačałasia jašče paŭtara hoda tamu. Niekalki chłopcaŭ pabilisia. Udzielniki pracesu kažuć, što bojka adbyłasia ŭ ich praz «niesupadzieńnie pohladaŭ na žyćcio». Padsudny Maksim Jahnieška prytrymlivajecca antyfašysckich pohladaŭ, a adzin z paciarpiełych — były ŭdzielnik nieanacysckich niefarmalnych hrodzienskich hrupovak. Va ŭsiakim razie, tak jon havaryŭ na adnym z sudovych pasiadžeńniaŭ. Potym jon hetuju infarmacyju nie paćvierdziŭ, a z nahody bojki, z-za jakoj razhareŭsia ŭvieś syr-bor, adznačaŭ, što jana paŭstała praz «asabistuju niepryjaznaść».
«…Uradženiec i žychar Hrodna ŭ adzin ź dzion u pieryjad studzienia-lutaha 2015 hoda pablizu kramy «Mierkuryj» pa vulicy Cieraškovaj 29a, z chulihanskich mierkavańniaŭ, hruba parušajučy hramadski paradak i vykazvajučy vidavočnuju niepavahu da hramadstva, žadajučy prajavić svaju fizičnuju pieravahu, zdolnaść da biasčynstvaŭ, žorstkaść i źniavažyć čałaviečuju hodnaść paciarpiełaha, hrebujučy ahulnapryniatymi normami pavodzinaŭ hramadstva, u prysutnaści inšych hramadzian, padvierhnuŭ źbićciu paciarpiełaha», — paviedamlajuć dakumienty. U chodzie śledstva było vyśvietlena, što Maksim nanios nie mienš čym adzin udar u hałavu i ŭ tvar paciarpiełamu. Adnak paśla dadzienaj bojki mienavita Maksim apynuŭsia ŭ balnicy.
— Pa sutnaści — heta mianie źbili. Na vychadzie ź miedycynskaj ustanovy mianie čakali milicyjanty. Skazali, kab ja napisaŭ zajavu, maŭlaŭ, davaj hetych fašystaŭ zasadzim, ale ja admoviŭsia. Takija niaznačnyja sutyčki pamiž udzielnikami niefarmalnych abjadnańniaŭ u Hrodnie adbyvajucca dastatkova časta. Možna skazać, što heta rucinnaja źjava. Nie dumaŭ, što dadzienaja bojka pryviadzie da takich nastupstvaŭ. Ale, napeŭna, kamuści vyhadna, kab ja atrymaŭ taki vialiki termin i pierastaŭ zajmacca svajoj dziejnaściu.
— Z-za čaho bojka ŭźnikła?
— Kampanija ahresiŭna nastrojenych maładych ludziej pryčapiłasia da źniešniaha vyhladu majho siabra — u pryvatnaści, im nie padabalisia jaho zavušnicy ŭ vušach. Ja vyrašyŭ zastupicca. Zvyčajnaja sprava. Takija bojki ŭ Hrodnie byli i 10, i 15 hadoŭ tamu. Praź niejki čas ja daviedajusia, što na tych chłopcaŭ, chto napadaŭ, była zaviedzienaja kryminalnaja sprava. Byccam by pa artykule ab chulihanstvie. Ja vystupaŭ u jakaści paciarpiełaha. Mianie niekalki razoŭ vyklikali ŭ milicyju i prasili napisać na ich zajavu, ale ja admaŭlaŭsia. Potym usio heta skončyłasia. Praz paŭhoda kryminalnuju spravu spynili. A prykładna jašče praz hod ja daviedvajusia, što zaviedzienaja novaja, ale ŭžo na mianie. Heta značyć, praz hod paśla bojki maje apanienty napisali zajavu na mianie. Nibyta ja pahražaŭ nažom, prystaŭlaŭ jaho da horła. Adnak u mianie naža nie było. Jaho tak i nie znajšli.
Fota: racyja.com
— U spravie niama ni źniaćcia pabojaŭ, ni rečyŭnych dokazaŭ. Jość tolki zajava paciarpiełych i ich błytanyja pakazańni ŭ sudzie, — kaža advakat Maksima.
Artykuł, pavodle jakoha abvinavačvali chłopca, — bolš surovy, čym prostaje chulihanstva — art. 186 «Pahroza zabojstvam, pryčynieńniem ciažkich cialesnych paškodžańniaŭ abo źniščeńniem majomaści ahulnaniebiaśpiečnym sposabam, kali mielisia padstavy bajacca jaje ažyćciaŭleńnia».
— Potym da hetaha abvinavačvańnia dadałosia jašče adno — ab kradziažy.
— A heta što za historyja?
— Pa słovach śledčaha, ja ź jašče dvuma niavyśvietlenymi ludźmi źniaŭ z hałavy paciarpiełaha viazanuju šapku z nadpisam «Wild Group» koštam u 50 tysiač niedaminavanych rubloŭ. Adnak mianie tady nie było navat pobač.
U spravie fihuruje i druhaja bojka, dakładniej — navat nie bojka, a psichałahičny hvałt. Tak, u krasaviku 2015 Maksim, pa słovach śledčaha, byŭ zaŭvažany jašče ŭ adnoj bojcy, padčas jakoj jon pavaliŭ na ziamlu druhoha paciarpiełaha, jaki prachodzić pa spravie, uziaŭ jaho za šyju i «z metaj zapałochvańnia dastaŭ z kišeni adzieńnia nož, jaki vykarystoŭvaŭsia ŭ jakaści pryłady złačynstva, ahaliŭ lazo naža i prystaviŭ da šyi».
— Ale naža nijakaha nie było, — razvodzić rukami Maksim.
Sud razhladaŭ spravu pa sutnaści. Uvaha na prynaležnaść da roznych niefarmalnych hrupovak nie źviartałasia. Adnak u chodzie pasiadžeńniaŭ, pa słovach udzielnikaŭ pracesu, jak paciarpiełych, tak i padsudnaha, pra heta havaryłasia nie raz. A sam Maksim upeŭnieny, što taki strohi prysud i toje, što sprava razhladałasia ŭ zakrytym režymie, mienavita z-za taho, što jon naležyć da antyfašysckaha ruchu i zajmajecca dosyć aktyŭnaj dziejnaściu ŭ hetym kirunku.
Paśla suda paciarpiełyja taksama byli razhublenyja i kazali, što prasili sudździu pra nie vielmi strohaje pakarańnie.
— Ja pretenzij da Maksima nie maju. Prysud abskardžvać nie budu. Dy i naohuł, prasiŭ sud stroha nie karać jaho. Daŭno ž heta było, — kaža Andrej.
— Ja taksama ździŭleny takomu prysudu. Nu, pabilisia — pacany ž, z kim nie byvaje, — kaža baćka druhoha paciarpiełaha.
Pa słovach Maksima, paciarpiełyja padčas słuchańniaŭ stali admaŭlacca ad svaich pieršapačatkovych słoŭ, a z nahody svaich zajaŭ, jakija jany napisali amal praz paŭtary hady paśla zdareńniaŭ, skazali, što «ich paprasili ŭ milicyi».
Apošniaje pasiadžeńnie pa dadzienaj spravie prachodziła ŭ adkrytym režymie — začytvałasia tolki rezalutyŭnaja časta prysudu. Padtrymać Maksima pryjšli jaho siabry.
Vynik — try hady «chimii».
Z takim rašeńniem suda Maksim nie zhodny i budzie jaho abskardžvać.
