Pa słovach namieśnika dyrektara biełaruskaha muzyčnaha festu, kiraŭnictva addało pieravahu rasiejskamu ŭdzielniku «Jeŭrabačańnia».
Arhanizatary muzyčnaha fiestyvalu «Słavianski bazar», jaki startuje ŭ Viciebsku 14 lipienia, vyrašyli admovicca ad vystupu pieramožcy «Jeŭrabačańnia-2016» — ukrainskaj śpiavački Džamały. Pra heta stała viadoma z krynic u arhkamitecie fiestyvalu. Raniej vystup pieramožcy «Jeŭrabačańnia» zaŭsiody byŭ hałoŭnym upryhožvańniem prahramy «Słavianskaha bazaru». Adnak u vynikovych afišach fiestyvalu imia Džamały tak i nie źjaviłasia. Z krynic u arhkamitecie «Słavianskaha bazaru» stała viadoma, što pieramovy z vykanaŭcaj vialisia niekalki miesiacaŭ, adnak arhanizatary nie zmahli zadavolić šerah umoŭ ukrainskaj delehacyi i vyrašyli admovicca ad zaprašeńnia jaje ŭ jakaści hościa. Hałoŭnaj pryčynaj admovy ŭ kułuarach konkursu nazyvajuć aściarohi arhanizataraŭ i imknieńnie paźbiehnuć palityčnych akcyj, jakija kamanda Džamały dazvalała sabie padčas «Jeŭrabačańnia» ŭ Šviecyi.
Pa słovach namieśnika dyrektara fiestyvalu Julii Vajłunavaj, adsutnaść u prahramie pieramožcy «Jeŭrabačańnia» jany nie ličać vialikaj strataj.
— U nas vystupić inšy ŭdzielnik «Jeŭrabačańnia», ad Rasii, — Siarhiej Łazaraŭ, usie vielmi zadavolenyja hetym vybaram, — paviedamiła Vajłunava. — Taksama vystupić udzielnik hetaha hoda ŭ «Jeŭrabačańni» śpiavak IVAN. Dla nas hetaha dastatkova.
Vajłunava paličyła za lepšaje ŭstrymacca ad kamientaroŭ z nahody pieramovaŭ z Džamałoj i abmierkavańniaŭ jaje umovaŭ udziełu ŭ kulturnaj padziei.
— Časam my zaprašajem pieramožcu sioletniaha «Jeŭrabačańnia», a časam nie. Heta całkam naša vola, — patłumačyła namieśnik dyrektara. — U hetym hodzie pieramožcy ŭ Viciebsku nie budzie. U nas nie było času zajmacca abmierkavańniem umoŭ pryjezdu Džamały. Nam treba było vyrašać inšyja zadačy, voś i ŭsio.
