Na dniach stała viadoma, što ŭ listapadzie ŭ Minsk płanuje pryjechać rasijski televiadučy i prapahandyst Uładzimir Sałaŭjoŭ.
Jahony «tvorčy viečar» maje adbycca ŭ vialikaj zale Pałaca Respubliki.
Voś jak patłumačyŭ nam pryjezd adyjoznaha viadučaha namieśnik dyrektara Pałaca Respubliki Juryj Navumovič.
«Viedajecie, kali šukać niehatyŭnyja momanty, to ich možna znajści ŭ lubym čałavieku, — skazaŭ Juryj. — Prapahandyst… Nu narmalnaja prahrama ŭ jaho, ź jakoj pryjazdžaje, jak artyst, jak tvorčy čałaviek. Jon ža ž i na ekranie pracuje, rasijskaje telebačańnie jaho pakazvaje. Kali ž u słovach budzie kramoła… My pakul tolki ŭjaŭlać možam, budzie jana ci nie. Davajcie prymać niepryjemnaści pa miery pastupleńnia. Da nas niejak pryjazdžaŭ «Ramštajn», i taksama kazali, što heta hurt, jaki vielmi prapahanduje tam roznaje… Pryjechali, i ŭsio było ŭ miežach dazvolenaha».
Na pytańnie, chto vystupiŭ inicyjataram «tvorčaha viečara», Juryj adkazaŭ tak: «My znajšli artysta, jaki pryjazdžaje da nas i pracuje. Chto moža jaho zabaranić?».
«Nam budzie vielmi pryjemna, kali vy pryjdziecie i nabudziecie kvitok», — skončyŭ razmovu Juryj.
