Vialiki i dobry vołat
Žanr: pryhody, fentezi, siamiejny
Režysior: Styvien Śpiłbierh
U rolach: Mark Rajłens, Rubi Barnchił, Pieniełopa Uiłtan, Džejmien Klemient, Rebieka Choł.
Vialikabrytanija, Kanada, ZŠA, 117 chv.
Adznaka: 7
Safi žyvie ŭ dziciačym domie — jaje rodnyja zahinuli. Jana čaściakom nie moža zasnuć nočču.
Adnaho razu jana ŭbačyła ŭ akienca vializnuju istotu, jakaja padychodziła da susiednich damoŭ i praz trubu dźmuła ŭ vokny spalniaŭ. U poŭnaj adpaviednaści sa staradaŭnimi pavierjami i dziciačymi strašyłkami, vielikan zaŭvažyŭ Safi i zabraŭ da siabie u krainu vielikanaŭ.
Jak akazałasia, u hetaj krainie jon adziny dobry vielikan: u adroźnieńnie ad svaich starejšych bratoŭ jon nie charčujecca ludźmi. Naadvarot, jon źbiraje dobryja sny i pa načach razdaje ich dzieciam. Ale nichto ź ludziej nie pavinien bačyć vielikanaŭ — tady ich upalujuć i pasadziać za kraty, jak u zaaparku. Safi vymušanaja pražyć ź Vialikim i Dobrym vołatam da kanca svaich dzion, ale jana nie zhodnaja mirycca pavodzinami inšych vielikanaŭ, jakija štonoč jaduć dziaciej.
Film źniaty pa adnajmiennaj knizie brytanskaha piśmieńnika Roalda Dala.
U apošnija hady žyćcia jon šmat pisaŭ dla dziaciej, i hetyja knihi ekranizavalisia najčaściej. Najbolš viadomaja ekranizacyja Cima Biortana «Čarli i šakaładnaja fabryka» (2005).
Hetym razam za pieraniasieńnie knihi na ekran uziaŭsia viadomy ŭ Halivudzie režysior, udadalnik niekalkich «Oskaraŭ» Styvien Śpiłbierh, jaki da taho zdymaŭ trylery i dramy ( «Śpis Šyndlera»(1993), «Uratavać radavoho Rajana» (1998), «Złavi mianie, kali zmožaš» (2002)).
U režysury dziciačaj kazki hety film — jaho pieršy dośvied. U intervju jon pryznaŭsia: «Ja vielmi aściarožna staviŭsia da vybaru svajoj pieršaj kazki. Kali ja pračytaŭ knihu Roalda Dala svaim dzieciam, ja zrazumieŭ, što, kali ja ŭsio ž taki źbiarusia zdymać kazku, heta budzie mienavita hetaja historyja».
Na rol hałoŭnaj hieraini, mieleńkaj Safi, była ŭziataja dziesiacihadovaja vučanica škoły Lower Peover (Vialikabrytanija) Rubi Barnchił. Padčas padrychtoŭki da prasłuchoŭvańnia joj daviałosia vyvučyć šeść staronak dyjałohu z vołatam. Vielikana syhraŭ uładalnik sioletniaha «Oskara» (najlepšaja rol druhoha płana ŭ filmie «Špijonski most»), brytaniec Mark Rajłens.
«Vialiki i dobry vołat» taksama źjaŭlajecca pieršym filmam Śpiłbierha, źniatym pad brendam «Dyśniej». U stužcy skarystanyja samyja sučasnyja technałohii. Rajłens vykanaŭ rolu piersanaža pry dapamozie technałohii zachopu ruchu. Było zbudavana try zdymačnyja placoŭki. Na adnoj ź ich rečy i dekaracyi byli vyrablenyja ŭ hihanckich pamieraŭ, kab Rubi Barnchił zmahła adčuć siabie ŭ krainie vielikanaŭ.
Knihi Roalda Dala adroźnivajucca źjedlivaściu i ironijaj. Dal nie ličyŭ dziaciej durniejšymi za darosłych, jaho čaroŭnyja siužety byli tolki abhortkami da žorstkaj rečaisnaści. Na žal, usie, chto braŭsia ekranizavać dziciačyja knihi Dala, pazbaŭlali filmy hetaha hłybokaha sensu.
Na vychadzie atrymlivajecca cudoŭnaja, pryhožaja, dobraja kazka, ale jaŭna addalenaja ad aryhinału.
Hetak ža vyjšła z «Vielikanam». U filmie šmat dyjałohaŭ, ale niekatoryja sensy zhublenyja (čaho vartyja razvahi vołata pro toje, što tolki ludzi zabivajuć adzin adnaho dziela zabavy, kali inšyja žyviołki, navat drapiežniki, hetaha nie robiać). Dadadziena ekšnu i dramatyčnych linij, choć samaje strašnaje, što adbyvajecca na ekranie - sceny ździeku z maleńkaha 7-mietrovaha dobraha vielikana jaho zdaraviennymi 15-mietrovymi bratami. U kancy knihi vielikanaŭ faktyčna sadžajuć za kraty (adbyvajecca toje, čaho jany i bajalisia), u filmie ž usio trochi miakčej i humańniej.
U vyniku majem fantastyčna pryhožuju kazku, jakaja, biezumoŭna, vartaja prahladu razam ź dziećmi. Mahčyma, razam ź dziećmi varta taksama pačytać i knihi Dala.
