Biełaruś žadaje narmalizavać adnosiny sa Złučanymi Štatami Amieryki na ŭzajemavyhadnych umovach, zajaviŭ Alaksandr Łukašenka, prymajučy 6 lipienia časovaha pavieranaha ŭ spravach ZŠA ŭ Biełarusi Skota Rołanda ŭ suviazi sa skančeńniem jaho dypłamatyčnaj misii ŭ Minsku.
«My nikoli nie chavali taho faktu, što biez narmalizacyi adnosin sa Złučanymi Štatami my nie budziem mieć paŭnavartasnaj źniešniaj palityki. My nie ŭtojvajem, što vielmi chacieli b narmalizacyi stasunkaŭ z ZŠA na ŭzajemavyhadnych umovach».
Biełaruski kiraŭnik adznačyŭ palapšeńnie adnosin pamiž Minskam i Vašynhtonam u apošni čas. «Skazać, što ŭ nas usio dobra ŭ adnosinach pamiž dziaržavami, napeŭna, budzie nie zusim vyhladać ščyra navat dypłamatyčna. Ale taho, što značna lepš, čym było, i što my ruchajemsia ŭ narmalnym, pravilnym kirunku, napeŭna, i vy nie staniecie admaŭlać», — skazaŭ Łukašenka. «Pry dobraj voli kiraŭnictva Złučanych Štataŭ my vielmi mnohaje možam zrabić u najbližejšaj budučyni», — dadaŭ jon.
Pavodle słoŭ Łukašenki, u Biełarusi jość peŭnyja abaviazacielstvy pierad krainami-susiedziami, u tym liku ciesnaje supracoŭnictva z Rasijaj i takimi dziaržavami, jak Kitaj i Indyja. «Heta našy stratehičnyja sajuźniki, partniory. My ź imi zaklučyli adpaviednyja damovy», — padkreśliŭ jon.
«Kali pryjazdžajuć sa Złučanych Štataŭ biźniesmieny i ja ź imi sustrakajusia, abmiarkoŭvajučy inviestycyjny klimat u Biełarusi, ja im kažu: pracujcie ŭ nas u Biełarusi pa amierykanskich zakonach, my stvorym vam takoje pravavoje pole. Jany kažuć: nie, my chočam pa biełaruskich zakonach. I ja im za heta ŭdziačny, — raskazaŭ Łukašenka. — Heta dla mianie vielmi mocny ryčah i asnova dla razmovy ź inšymi biźniesmienami. Treba addać naležnaje, što, sapraŭdy, amierykancy — ludzi zusim roznyja, ale heta ščyryja ludzi, jakija, bačačy svaju cikavaść, chacieli b sumlenna supracoŭničać z našaj Biełaruśsiu».
«Ja heta kažu dla taho, kab vy razumieli, što ŭ nas niama zabaronienych tem u supracoŭnictvie z vami, — rastłumačyŭ Łukašenka dypłamatu. — My nie majem ni pierad adnoj dziaržavaj abaviazacielstvaŭ, jakija b supiarečyli našamu supracoŭnictvu z ZŠA. Navat rasijanie nam zaŭsiody kažuć ab tym, što mieć narmalnyja adnosiny z Zachodniaj Jeŭropaj i ZŠA — heta absalutna prymalna i patrebna».
Skot Rołand źjazdžaje ź Biełarusi 8 lipienia. U jakaści časovaha pavieranaha ŭ spravach ZŠA ŭ Biełarusi jon pracavaŭ ź lipienia 2014 hoda
