Va ŭkrainskaj ambasadzie ŭ Minsku 12 maja ŭznaharodžvali biełaruskich vieteranaŭ, što za časami vajny vyzvalali Ukrainu ad hitleraŭskich vojskaŭ.
Čatyry čałavieki atrymali miedal «70 hadoŭ vyzvaleńnia Ukrainy ad niamiecka-fašysckich zachopnikaŭ». Ad imia prezidenta Piatra Parašenki miedali ŭručyŭ časovy pavierany ŭ spravach Ukrainy ŭ Biełarusi Valeryj Džyhun.
Ahułam ža ŭznaharody musili atrymać 667 čałaviek, ale dali rady pryjści tolki čatyry — astatnim miedali pieradaść naša Ministerstva abarony.
Valeryj Džyhun u svajoj vitalnaj pramovie adznačyŭ, što ŭ dzień, kali našy narody adznačajuć čarhovuju hadavinu Pieramohi ŭ Druhoj suśvietnaj, treba ŭzhadać, što mnostva biełarusaŭ bilisia za Dniapro, Krym, za Zachodniuju Ukrainu.
Šmat chto tam i zahinuŭ. Tamu narod Ukrainy takim čynam ušanoŭvaje ŭniosak biełarusaŭ u spravu vyzvaleńnia čužoj Baćkaŭščyny.
Takaja akcyja idzie nasupierak rasijskaj prapahandzie, jakaja ŭžo dva hady maluje novuju ŭkrainskuju ŭładu jak «fašysckuju chuntu».
Miedal atrymlivaje hienierał-major Siarhiej Novikaŭ.
Hienierał-major Alaksandr Fień atrymlivaje ŭznaharodu ad časovaha pavieranaha ŭkrainskaj ambasady.
Biełaruskija vieterany z pavahaj vykazalisia pra inicyjatyvu ŭkraincaŭ.
Hienierał-major Alaksandr Fień, naprykład, jašče i pryhadaŭ, jak paśla Korsuń-Šaŭčenkaŭskaj apieracyi los zakinuŭ jaho ŭ Biełaruś, dzie jon u jakaści kamandzira tankavaha ŭzvodu vyzvalaŭ Minsk i Zasłaŭje.
Pradstaŭniki Ministerstva abarony Biełarusi. Kali časovy pavierany padčas vitalnaha słova zapytaŭsia ŭ prysutnych, ci varta jamu pierajści na ruskuju movu, Valeryj Ravienka (źleva) pa-biełarusku skazaŭ, što «my ŭsio razumiejem».