Sud Centralnaha rajona Minska 19 krasavika viarnuŭ na dapracoŭku pratakoły ab administracyjnym pravaparušeńni, składzienyja ŭ dačynieńni da aktyvista apazicyi i lidara ruchu salidarnaści «Razam» Viačasłava Siŭčyka. Svajo rašeńnie sud abhruntavaŭ tym, što čas i miesca pravaparušeńnia nie adpaviadajuć pratakołu zatrymańnia, paviedamlaje pravaabarončy sajt spring96.org.
Palityk byŭ zatrymany milicyjaj u try hadziny nočy 19 krasavika. Jaho abvinavačvajuć u drobnym chulihanstvie i niepadparadkavańni patrabavańniam milicyi (art. 17.1 i 23.4 KoAP).
Pierad pačatkam suda Siŭčyk paviedamiŭ, što ŭnačy viartaŭsia dadomu, adnak supracoŭniki milicyi siłaj vyciahnuli jaho ŭžo z padjezda i advieźli ŭ Centralnaje RUUS. «Ja byŭ biez akularaŭ, a tamu nie mieŭ navat tearetyčnych mahčymaściaŭ padpisać pratakoły. Nichto mianie nie apytvaŭ, ničoha nie kazaŭ. Adzinaje, čamuści aficery kazali, što «ŭładu mnie nie addaduć», — zaznačyŭ jon.
Siŭčyk prasiadzieŭ u kamiery da 14 hadzin, paśla čaho jaho pavieźli ŭ sud. «Zrazumieć, navošta ja tam znachodziŭsia stolki času, nie mahu», — skazaŭ jon.
Pravaabaroncy ŭžo vykazali zaniepakojenaść praceduraj zatrymańnia Siŭčyka. «Apošnim časam supracoŭniki milicyi aktyvistaŭ nie zatrymlivali: pratakoły składalisia na miescy, u milicyi zatrymlivali maksimum na hadzinu, — adznačyła pravaabaronca Anastasija Łojka. — Siŭčyk ža ŭ RUUS znachodziŭsia praciahły čas, zatrymali jaho nočču, dla Minska za apošnija paŭhoda heta nieardynarny vypadak».
Nahadajem, u vieraśni 2015 hoda Siŭčyk viarnuŭsia ŭ Biełaruś paśla niekalkich hadoŭ emihracyi. Jon vymušany byŭ źjechać z krainy paśla padziejaŭ 19 śniežnia 2010 hoda, bajučysia pieraśledu. Znachodziačysia ŭ emihracyi, u 2012 hodzie jon zarehistravaŭ u Čechii mižnarodnaje hramadskaje abjadnańnie «Ruch salidarnaści «Razam». Dziejnaść abjadnańnia była nakiravanaja na padtrymku demakratyi ŭ Biełarusi i Ukrainie. Ciapier ruch u Biełarusi dziejničaje ŭ statusie arhkamiteta.
