Dla paćvierdžańnia statusu tvorčaha rabotnika nieabchodna budzie źviarnucca ŭ ekśpiertnuju kamisiju, stvoranuju pry Ministerstvie kultury. Heta prapisana ŭ prajekcie Kodeksa Biełarusi ab kultury, paviedamiła namieśnik staršyni Pastajannaj kamisii Pałaty pradstaŭnikoŭ pa adukacyi, kultury i navucy Natalla Kučynskaja.
Pavodle słoŭ deputata, padčas dapracoŭki prajekta dakumienta da druhoha čytańnia vialisia doŭhija dyskusii nakont taho, jakim čynam budzie paćviardžacca status tvorčaha rabotnika dla hramadzian, jakija nie znachodziacca ŭ tvorčych sajuzach.
«Heta maje na ŭvazie vydaču śpiecyjalnaha siertyfikata. Pytańnie aktualizavanaje ŭ suviazi z pryniaćciem u Biełarusi dekreta ab sacyjalnym utrymanstvie, u jakim raskryvajucca pałažeńni ab udziele hramadzian u finansavańni dziaržaŭnych vydatkaŭ. Hramadzianin, jaki paćvierdziŭ status tvorčaha rabotnika, źjaŭlajecca ŭdzielnikam finansavańnia dziaržaŭnych vydatkaŭ», — patłumačyła Natalla Kučynskaja.
Takim čynam, u prajekcie Kodeksa ab kultury prapisana, što status tvorčych rabotnikaŭ, jakija źjaŭlajucca členami sajuzaŭ, buduć paćviardžać hetyja sajuzy. A voś volnyja mastaki pavinny buduć źviartacca ŭ ekśpiertnuju kamisiju, stvoranuju pry Ministerstvie kultury. Hetaja kamisija budzie aceńvać ich tvory i prymać rašeńnie ab vydačy ci niavydačy siertyfikataŭ.
Pry hetym vyznačanyja krytery acenki. Naprykład, tvor pavinien źjaŭlacca pryncypova novym, samastojnym vynikam intelektualnaj dziejnaści. Jaho mastacki ŭzrovień pavinien adpaviadać prafiesijnamu. Što tyčycca muzyčnych i drukavanych tvoraŭ, jany taksama pavinny na praciahu apošnich troch hadoŭ (nie mienš za dva razy na hod) publikavacca, publična vykonvacca abo inšymi sposabami davodzicca da ŭsieahulnaha viedama.
«Siertyfikat, vydadzieny tvorčamu rabotniku, moža być anulavany», — zaŭvažyła parłamientaryj. Padstavaj dla hetaha budzie słužyć rašeńnie suda, jakoje śviedčyć, što čałaviek u rečaisnaści nie źjaŭlajecca aŭtaram (vykanaŭcam) tvoraŭ litaratury i mastactva.
