Avijakampanija «Biełavija» spadziajecca na prychod u Biełaruś nizkabiudžetnaha pieravozčyka z Abjadnanych Arabskich Emirataŭ Flydubai, paviedamiŭ namieśnik hienieralnaha dyrektara pa markietynhu i źniešnieekanamičnaj dziejnaści AAT «Avijakampanija «Biełavija» Ihar Čarhiniec na sustrečy z žurnalistami 3 sakavika ŭ Minsku z nahody 20-hodździa zasnavańnia kampanii.
«My byli ŭ ofisie Flydubai, sustrakalisia ź jaje prezidentam, jaje kamiercyjnym dyrektaram i zaprašali pačać paloty ŭ Biełarusi. Jany razhladajuć takuju mahčymaść. Pakul kančatkovaha rašeńnia ź ich boku niama, ale my spadziajemsia», — skazaŭ Čarhiniec.
«Naš pasoł u Emiratach pastajanna sustrakajecca z pradstaŭnikami avijakampanii i viadzie pieramovy», — dapoŭniŭ jon.
Zacikaŭlenaść «Biełavija» ŭ hetym prajekcie zaklučajecca ŭ padvozie pasažyraŭ ź inšych miescaŭ da rejsaŭ Flydubai ŭ Minsku. Jak adznačyŭ Čarhiniec, u mahčymym supracoŭnictvie z emirackim łaŭkost-pieravozčykam ŭ «Biełavija» «jak raz znajšli madel kamiercyjnaha ŭzajemadziejańnia».
«Heta jak raz da taho, što «Biełavija» nie puskaje ŭ krainu łaŭkosty, — prakamientavaŭ hienieralny dyrektar biełaruskaj kampanii Anatol Husaraŭ. — Treba razumieć, što łaŭkost-avijakampanii ličać hrošy lepš za tradycyjnych avijakampanij, lepš za nas. Jany ž nie zajmajucca dabračynnaściu za košt tannych biletaŭ. Tamu, budzie dla ich tut rynak, vialikaja kolkaść pasažyraŭ, jakija časta lotajuć, — jany pryjduć da nas».
Łaŭkostar Flydubai źjaviŭsia na suśvietnym rynku pasažyrskich pieravozak adnosna niadaŭna, u 2009 hodzie. Hałoŭny chab avijakampanii znachodzicca ŭ mižnarodnym aeraporcie Dubaj. Maršrutnaja sietka hetaj arabskaj avijakampanii ŭklučaje pryblizna 80 kirunkaŭ. Asablivaja ŭvaha nadadzienaja krainam SND, bo mienavita adtul prychodzić istotny patok turystaŭ praktyčna kruhły hod.
