Čakajecca vychad novaha ŭkaza prezidenta, jaki rehuluje apłatu žyllova-kamunalnych pasłuh, paviedamiŭ staršynia Savieta Respubliki Nacyjanalnaha schodu Biełarusi Michaił Miaśnikovič na sustrečy z kalektyvam Viciebskaha dziaržaŭnaha miedycynskaha ŭniviersiteta 2 sakavika.
«Va ŭsich na vusnach siońnia tema ŽKH. Taryfy zaćviardžajucca ŭradam, i ŭsie ŭ krainie płaciać adnolkava, — cytuje Miaśnikoviča BiełTA. — Kali jość niejkija niedachopy, to jany nie ŭ sistemie, a ŭ tym, jak heta ŭsio raźličvajecca i vystaŭlajecca ŭ žyroŭkach. I jašče: usie my, spažyŭcy pasłuh, pavinny razumieć, što najbližejšym časam daviadziecca apłačvać 100% koštu hetych pasłuh».
«Ale tut jość adzin niuans — kali havorka idzie pra ŭzrovień kampiensacyi. Raschody na apłatu nasielnictvam ŭsich vidaŭ žyllova-kamunalnych pasłuh u cełym nie pavinny pieravyšać peŭny paroh», — dadaŭ śpikier vierchniaj pałaty parłamienta.
Pavodle jaho słoŭ, Saviet Respubliki i ŭrad užo padrychtavali dakumienty, nieabchodnyja dla pryniaćcia adpaviednaha ŭkaza.
«U prapanovach, jakija ŭžo adpracavanyja (choć ja nie mahu śćviardžać, što jany buduć pryniatyja ŭ takim vyhladzie), jość abmiežavańni dla małamajomnych subjektaŭ haspadarańnia i chatnich haspadarak, — skazaŭ Miaśnikovič. — Kali vydatki na apłatu ŽKP u horadzie pieravyšajuć 20% sukupnaha dachodu siamji (uklučajučy piensijanieraŭ, studentaŭ i hetak dalej), to ŭsio, što zvyš, budzie kampiensavacca za košt biudžetu. I 15% — miaža ŭ sielskaj miascovaści, da jakoj adnosiacca i bolšaść rajcentraŭ».
«Kali davodzicca čuć u ŚMI pra toje, što treba budzie addavać uvieś zarobak abo piensiju na apłatu kamunalnych pasłuh, — heta nie tak. Heta nie adpaviadaje sacyjalnaj palitycy našaj krainy», — padkreśliŭ Miaśnikovič.
Nahadajem, u studzieni subsidavanyja taryfy na aciapleńnie i padahreŭ vady vyraśli ŭ Biełarusi na 33,3%, na chałodnuju vadu i kanalizacyju — u 3,54 razy. Poŭny taryf na aciapleńnie i padahreŭ vady pavysiŭsia na 83,4%, elektraenierhija padaražeła na 29,5%. Na fonie padzieńnia zarpłat rezkaje padaražańnie pasłuh ŽKH vyklikała vielmi niehatyŭnuju reakcyju ŭ hramadstvie.
