Akramia taho, prakurory prosiać aštrafavać Nadzieju Saŭčanka na 100 tys. rasijskich rubloŭ.
Na pasiadžeńni suda ŭ Rasii pa spravie ŭkrainskaj lotčycy Nadziei Saŭčanka abvinavačańnie ŭ chodzie sprečak paprasiła prysudzić padsudnuju da 23 hadoŭ pazbaŭleńnia voli. Pra heta ŭ Twitter paviedamiŭ advakat Mikałaj Połazaŭ.
«Prakuror Filipčuk zapytaŭ Nadziei Saŭčanka pa sukupnaści 23 hady pazbaŭleńnia voli», - paviedamiŭ Połazaŭ.
Prakuratura prosić pryznać Saŭčanka vinavataj u zabojstvie i pa hetym artykule pryznačyć joj pakarańnie ŭ vyhladzie 18 hadoŭ kałonii, u zamachu na zabojstva (13 hadoŭ kałonii) i niezakonnym pierasiačeńni miažy (štraf u pamiery 100 rasijskich tysiač rubloŭ). 23 hady kałonii — heta pakarańnie pa sukupnaści.
***
Nadzieju Saŭčanka sudziać pavodle abvinavačvańnia ŭ datyčnaści da hibieli supracoŭnikaŭ VHTRK Ihara Karnieluka i Antona Vałošyna pad Łuhanskam u červieni 2014 hoda. Pavodle viersii abvinavačvańnia, ukrainskaja vajskoŭka była karektoŭščykam ahniu pry abstrele, u vyniku jakoha zahinuli karespandenty.
Saŭčanka nastojvaje na svajoj nievinavataści. Advakaty sprabavali dakazać u sudzie, što da pačatku abstrełu Saŭčanka ŭžo znachodziłasia ŭ pałonie ŭ sieparatystaŭ u Danbasie.
Pa viersii śledstva, Saŭčanka niezakonna pierasiakła miažu Rasii z Ukrainaj, paśla čaho była zatrymanaja. Padsudnaja śćviardžaje, što jaje pierapravili na rasijskuju terytoryju paśla taho, jak zachapili ŭ pałon pad Łuhanskam.
