«Rasprava z adździaleńniami bankaŭ u Kijevie prajšła b pa-za našaju ŭvahaju, kab nie asoby niekatorych udzielnikaŭ začystki — biełarusaŭ, — napisaŭ histaryčny lidar Maładoha Frontu Źmicier Daškievič u svaim artykule na sajcie Mfront.net. — Kožnaja nacyja ŭ roznyja pieryjady svajoj historyi stanaviłasia pierad nieabchodnaściu bracca ci za kamiani, ci za aŭtamaty. Adnak ci heta pieršasna, kab pryjšło doŭhačakanaje zbaŭleńnie, kab adbylisia pieramieny, dziela jakich mnohija dziasiacihodździami achviarujucca?
Lubyja pieramieny i luboje adradžeńnie treba pačynać ź siabie. I tamu było b łahičniej, kab Parfiankoŭ z Łobavym pierajšli na biełaruskuju ci navat ukrainskuju movu – i takim čynam pačali b adradžeńnie nacyi kožny ŭ svajoj hałavie.
Až nie, takoha nie nazirajecca, bo vyvučyć rodnuju movu — heta ciažkaja i karpatlivaja praca, pasrodkam jakoj ty štodnia i pa kropli vyciskaješ ź siabie savieckaha čałavieka. Praściej uziać kamiani i zmahacca z savieckimi čałaviekami, pavybivaŭšy im jeŭrapiejskija šyby?» — pytajecca Daškievič.
U internecie źjaviłasia videa, na jakim zafiksavana, jak biełarus Vasil Parfiankoŭ udzielničaje ŭ razhromie adździaleńnia «Alfa-banka» ŭ Kijevie.
Parfiankoŭ pierajechaŭ va Ukrainu i ŭstupiŭ tam u Dobraachvotnicki korpus AUN («Arhanizacyja ŭkrainskich nacyjanalistaŭ»). Niadaŭna jon atrymaŭ dazvoł na žycharstva va Ukrainie.
Hrupoŭka AUN publična abviaściła ŭ Kijevie «akcyju pa źniščeńni rasijskaha biznesu».
Na minułych vychadnych bajcy atrada «pabili» ofis Rynata Achmietava, razhramili ofis rasijskaha «Alfa-banka» i pabili vitryny ŭ ofisie «Śbierbanka Rośsii».
Prezident Ukrainy Piatro Parašenka nazvaŭ napady na ofisy pravakacyjaj.
Rasijskija ŚMI zrabili hetyja zdareńni hałoŭnaj temaj svaich vypuskaŭ na hetych vychadnych.
Vasil Parfiankoŭ — pieršy, kaho zatrymali ŭ suviazi z pahromami.
Jaho abvinavačvajuć pa artykule 296 č.2 kryminalnaha kodeksu Ukrainy «Chulihanstva». Pavodle hetaha artykułu, Parfiankovu moža pahražać da čatyroch hadoŭ źniavoleńnia.
Bolš za hod Parfiankoŭ znachodzicca va Ukrainie, dzie prymaŭ udzieł u bajavych dziejańniach. Byŭ paranieny ŭ nahu, doŭhi čas lačyŭsia. Mieŭ pazyŭny «Siabra».
U Biełarusi Parfiankoŭ aryštoŭvaŭsia za ŭdzieł u padziejach na Płoščy ŭ 2010-m. Paźniej jaho taksama nakiroŭvali na prymusovaje lačeńnie ad ałkahalizmu.
U internecie raspaŭsiudžvajecca inšy kadr z razhromu. Na im, imavierna, zafiksavany inšy biełarus, što pajechaŭ vajavać va Ukrainu — Eduard Łobaŭ.
Jon pakul nie adkazaŭ na zapyt «Našaj Nivy» pra kamientar.
