Sud na poŭdni Jehipta prysudziŭ troch vučniaŭ škoły da piaci hadoŭ źniavoleńnia kožnaha za «abrazu isłamu».
Jašče adzin padletak va ŭzroście 15 hadoŭ budzie nakiravany ŭ kałoniju dla niepaŭnaletnich na niavyznačany termin. Usie jany źjaŭlajucca koptami (jehipieckija chryścijanie).
Čaćviora školnikaŭ byli asudžanyja z-za videa, na jakim adzin ź ich prykidvaŭsia musulmaninam, jaki molicca.
Jašče čaćviora stajali zzadu, śmiajalisia i ŭdavali abiezhałoŭlivańnie musulmanina (adzin z padletkaŭ uciok, jaho šukajuć). Videa było źniata ŭ studzieni 2015 hoda, na toj momant školnikam było pa 15—17 hadoŭ.
Pa słovach advakata Machiera Nahiba, prysudžanyja školniki pražyvajuć u pravincyi El-Mińja. Jany nie byli zatrymanyja i nie prysutničali na sudzie.
Jak adznačyŭ Nahib, jamu ciažka pavieryć, što padletkaŭ prysudzili da takich terminaŭ. Pavodle jaho słoŭ, u hetym vypadku było dastatkova štrafu.
Advakat sprabavaŭ dakazać sudu, što jaho padabaronnyja śmiajalisia nie nad isłamam, a nad žorstkimi karami ekstremisckaj hrupoŭki «Isłamskaja dziaržava». Zaraz Nahib rychtujecca abskardzić prysud.
Videa źniaŭ na svoj telefon nastaŭnik školnikaŭ — 42-hadovy Had Junan. Paśla hetaha videa trapiła da susiedziaŭ školnikaŭ, jakija žyli ŭ vioscy Al-Nasryja. Kala dźviuch tysiač musulman vyjšli na vulicy i ŭčynili pahromy kopckich damoŭ.
