U Biełarusi płanujecca pačać vytvorčaść syroŭ ź biełaj ćvillu, paviedamiŭ 19 lutaha na pres-kanfierencyi ŭ Minsku dyrektar RUP «Instytut miasa-małočnaj pramysłovaści» Alaksiej Mielaščenia.
Jon nahadaŭ, što ŭ krainie ŭžo naładžany vypusk syroŭ z błakitnaj i zialonaj ćvillu na bazie Naračanskaha filijała Maładziečanskaha małakazavoda. Pry hetym, pavodle słoŭ śpiecyjalista, popyt na takuju pradukcyju ŭnutry krainy nie vielmi vysoki, jana ŭ asnoŭnym ekspartujecca ŭ Rasiju.
«U Biełarusi popytam karystajucca kłasičnyja syry («Rasijski»,»Hałandski») z terminami vyśpiavańnia 30—60 dzion. U Jeŭropie ž bolšaj papularnaściu karystajucca miakkija syry, jakija blizkija da našaha tvarahu», — adznačyŭ śpiecyjalist.
Pa struktury pierapracoŭki małaka Biełaruś nabližajecca da Jeŭropy: kala 40% idzie na vytvorčaść syroŭ, 30% — naturalnamałočnaj pradukcyi, 30% — suchich małočnych praduktaŭ.
Mielaščenia taksama raspavioŭ, što instytut zajmajecca raspracoŭkaj novych vidaŭ masła 92—94%, ale papularnaściu ŭ spažyŭcoŭ karystajecca masła 72,5% i 82%. «My raspracoŭvajem i prapanoŭvajem pradpryjemstvam šmat vidaŭ małočnaj pradukcyi. Ja liču, što našym pradpryjemstvam treba mieć šyrokuju liniejku pradukcyi, kab zajmać ź joj novyja nišy, u tym liku ŭ Rasii i na inšych rynkach», — adznačyŭ Mielaščenia.
Jon padkreśliŭ, što standarty na vytvorčaść małočnaj pradukcyi ŭ Biełarusi harmanizujucca ź jeŭrapiejskimi. «Pakul my trochi ad jeŭrapiejskich standartaŭ na syravinnaje małako adstajem, adpaviadajem tolki pa małaku ekstra. Razam z tym my bolš nie ŭžyvajem dla pierapracoŭki małako niehatunkovaje i II hatunku, — paviedamiŭ dyrektar instytuta. — Za 15 hadoŭ našy pradpryjemstvy prajšli madernizacyju i šerah ź ich nie sastupajuć zavodam u Litvie ci Estonii, a niekatoryja i pieraŭzychodziać».
