Pavodle nieaficyjnaj infarmacyi, supracoŭnikami KDB zatrymany pieršy namieśnik staršyni Homielskaha abłvykankama Alaksandr Maksimienka, hienieralny dyrektar AAT «Homielski miasakambinat» Ryčard Stefanovič i inšyja słužbovyja asoby. Zatrymańnie źviazana z machinacyjami ź miasam.
Pakul pravaachoŭnyja orhany nie kamientujuć zatrymańnie. U pryjomnaj pieršaha namieśnika staršyni abłvykankama adkazvajuć, što Alaksandr Maksimienka ŭ kamandziroŭcy i budzie na miescy na nastupnym tydni. Infarmacyju pra zatrymańnie sakratar nazvała čutkami. U pryjomnaj miasakambinata adkazali, što Ryčard Stefanovič budzie na pracy ŭ paniadziełak.
U mai 2014 hoda SK zatrymaŭ u Homieli pa padazreńni va ŭčynieńni šerahu karupcyjnych złačynstvaŭ pieršaha namieśnika staršyni abłvykankama Viktara Bančuka i namieśnika abłvykankama Viktara Tryznu. Zaraz u dačynieńni da ich Mahiloŭski abłasny sud razhladaje kryminalnuju spravu. Złačynstvy, jakija inkryminujucca im, taksama źviazanyja z machinacyjami ź miasam, jakoje pradavałasia ŭ Rasiju bieź pieradapłaty, i miasakambinaty Homielskaj vobłaści panieśli straty. Namieśnik staršyni abłvykankama łabiravaŭ intaresy svajho syna i rasijskich kamiercyjnych struktur.
Na pasadu novaha pieršaha namieśnika staršyni zamiest Viktara Bančuka paśla jaho zatrymańnia byŭ pryznačany Alaksandr Maksimienka.
Homielski miasakambinat nie pieršy raz traplaje ŭ karupcyjnyja skandały. Tak, u 2012 hodzie trapiŭ pad kryminalny pieraśled hienieralny dyrektar miasakambinata i jašče 28 čałaviek. Jany abvinavačvalisia ŭ kradziažy miasnoj pradukcyi. Pa spravie prachodzili 29 čałaviek — ad hienieralnaha dyrektara da zabojščyka žyvioły. Kryminalnyja spravy byli raspačatyja, u pryvatnaści, u dačynieńni da načalnikaŭ cechaŭ, ekanamistaŭ, namieśnikaŭ dyrektara, zahadčykaŭ stałovaj i mahazinam, a taksama troch milicyjanieraŭ.
Były dyrektar, jaki ŭznačalvaŭ pradpryjemstva z 1989 hoda, abvinavačvaŭsia ŭ stvareńni arhanizavanaj hrupy dla ŭčynieńnia złačynstvaŭ. Abvinavačvanyja atrymali roznyja terminy pazbaŭleńnia voli.
