Kinakarcina «Urok» Kryściny Hrozievaj i Pietera Vyłčanava (Bałharyja — Hrecyja) pryznanaja najlepšym filmam asnoŭnaha konkursu hulniavaha kino XXII Minskaha mižnarodnaha kinafiestyvalu «Listapad». Karcina ŭdastojena hran-pry — «Zołata «Listapada». Padviadzieńnie vynikaŭ adbyłosia na cyrymonii zakryćcia kinafiestyvalu viečaram 13 listapada ŭ staličnym kinateatry «Maskva».
«Sierabro «Listapada», druhaja pa vieličyni ŭznaharoda forumu, jakaja tradycyjna ŭručajecca žury kinapresy, prysudžana stužcy «Prajekt stahodździa» Karłasa Kinteła (Kuba — Arhiencina — Hiermanija — Šviejcaryja). Hetaja ž karcina stała ŭładalnicaj śpiecpryza žury asnoŭnaha konkursu hulniavaha kino «Za tvorčuju śmiełaść u spaścižeńni sučasnaści».
Pryz hladackich simpatyj, abo «Bronza «Listapada», dastaŭsia dacka-isłandskamu filmu «Barany» Hrymiura Chaŭkanarsana. Jamu taksama ŭručana śpiecyjalnaja ŭznaharoda Minharvykankama.
U miežach asnoŭnaha konkursu hulniavaha kino pryz za najlepšuju režysuru prysudžany režysioru filma «Zienit» (Sierbija — Charvatyja — Słavienija) Daliboru Mataniču, pryz za najlepšuju apieratarskuju pracu — apierataru hetaha ž filma Marka Brdaru.
Najlepšym filmam konkursu hulniavaha kino «Maładość na maršy» pryznany rasijski film «Pijaniery-hieroi» Natalli Kudrašovaj. Hetaja ž karcina atrymała pryz žury kinapresy «Za najlepšy akciorski ansambl», a taksama śpiecpryz Parłamienckaha schodu sajuza Biełarusi i Rasii «Za viernaść maralnym ideałam u kinamastactvie», raździaliŭšy hetu ŭznaharodu ź biełaruskaj kinastužkaj «Šlach u Damask» Arcioma Łobača.
Śpiecpryz žury konkursu «Maładość na maršy» prysudžany bałharskamu filmu «Smaha» Śvietły Cacorkavaj.
Hran-pry asnoŭnaha konkursu dakumientalnaha kino atrymała polskaja karcina «Braty» Vojcacha Staronia, a śpiecpryz žury — niderłandska-bielhijski film «Padzieja» Siarhieja Łaźnicy.
Rasijskaja stužka «Jamacha» Iny Amielčanka stała najlepšaj u konkursie maładoha dakumientalnaha kino — konkursie nacyjanalnych kinaškoł.
Najlepšym hulniavym filmam Nacyjanalnaha konkursu «Listapada» stała karcina «Biełaruski psichapat» Mikity Łaŭreckaha, najlepšym dakumientalnym — stužka «Hości» Andreja Kuciły, najlepšym animacyjnym — multfilm «Pra vała» Jaŭhiena Nadtačeja.
Padčas konkursu «Listapadzik» najlepšym filmam dla dziaciej pryznany italjanska-francuzski film «Chłopiec-nievidzimka» Habryele Salvatorasa, a najlepšym filmam dla junactva — rasijskaja karcina «Česnaje pijanierskaje — 2» Alaksandra Karpiłoŭskaha.
Aprača taho, pryz prezidenta «Za humanizm i duchoŭnaść u kino» ŭručany kirhizskaj stužcy «Niabiesnaje kačeŭje» Mirłana Abdykałykava. Hetaja ž karcina ŭdastoiłasia śpiecpryza «Kino bieź miežaŭ» Vykankama SND.
Sioleta kinaforum pryśviacili pamiaci historyka kino, kinakrytyka i adnaho z najstarejšych členaŭ kamandy kinafiestyvalu Ały Babkovaj, jakaja pajšła z žyćcia 15 kastryčnika hetaha hoda.
XXII Minski mižnarodny kinafiestyval «Listapad» prajšoŭ 6—13 listapada pad słohanam «Zadavalnieńnie dla vačej». Na im byli pakazanyja 184 karciny z 60 krain, u tym liku 91 hulniavy film, 70 dakumientalnych i 23 animacyjnyja stužki. Pakazy adbylisia ŭ piaci kinateatrach Minska — «Maskvie», «Miry», «Pieramozie», «Centralnym» i «Pijaniery».
